BČ znoŭ adpraŭlaje šviejcarskija i polskija ciahniki na techahlad i zamianiaje ich ciepłavozami

Biełaruskaja čyhunka paviedamlaje, što znoŭ adpravić šviejcarskija elektryčki Stadler (ciahniki mižrehijanalnych linij EPM) i polskija dyziel-ciahniki PESA (ciahniki rehijanalnych linij DP-3) na techahlad.

Zdymak ilustracyjny. Fota: Office Life

U paviedamleńni BČ havorycca tak:

«U suviazi z uźnikłaj nieabchodnaściu praviadzieńnia pazapłanavaha techničnaha ahladu ciahnikoŭ sieryi EPM i DP-3 asobnyja ciahniki mižrehijanalnych linij biznes-kłasa buduć iści sastavami, sfarmiravanymi z vahonaŭ łakamatyŭnaj ciahi».

Heta značyć, sučasnyja chutkasnyja sastavy zamieniać na elektravozy i ciepłavozy z pryčapnymi vahonami.

Zamienie padvierhnucca hetyja maršruty:

• z 6 pa 8 sakavika: ciahnik №733 Minsk — Brest adpraŭleńniem ź Minska ŭ 17.21 i prybyćciom u Brest u 21.06;
• z 7 pa 9 sakavika: ciahnik №734 Brest — Minsk adpraŭleńniem z Bresta ŭ 6.34 i prybyćciom u Minsk u 10.41;
• z 6 pa 12 sakavika: ciahniki №705 Połack — Mahiloŭ adpraŭleńniem z Połacka ŭ 7.11 i prybyćciom u Mahiloŭ u 10.48 i №706 Mahiloŭ — Połack adpraŭleńniem z Mahilova ŭ 17.20 i prybyćciom u Połack u 20.52.

U suviazi ź nieabchodnaściu zabieśpiačeńnia rassadki pasažyraŭ moža časova adsutničać mahčymaść nabyćcia prajaznych dakumientaŭ na hetyja ciahniki ŭ sistemach i punktach prodažu BČ. Treba pieryjadyčna adsočvać abnoŭlenuju infarmacyju ŭ adzinym raździele «Pasłuhi pasažyram» aficyjnaha internet-sajta Biełaruskaj čyhunki i ŭ mabilnym dadatku «BČ. Moj ciahnik».

Pasažyram, jakija raniej nabyvali prajaznyja dakumienty na nazvanyja ciahniki, budzie viernuta roźnica ŭ košcie prajezdu pry zvarocie ŭ biletnyja kasy Biełaruskaj čyhunki.

U pačatku lutaha niekatoryja ciahniki biznes-kłasa vytvorčaści polskaj kampanii PESA ŭ kirunku Viciebska i Mahilova ŭžo časova zamianialisia na sastavy ź ciepłavozami. Paśla takaja situacyja paŭtarałasia ź inšymi ciahnikami.

Tady aficyjnaj pryčynaj nazyvali nibyta niazdolnaść zachodniaj techniki pracavać u surovych umovach biełaruskaha nadvorja.

Kamientary da artykuła