Lidar vienhierskaj apazicyi pieraściaroh Rasiju ad umiašańnia ŭ parłamienckija vybary

Apazicyjny lidar Vienhryi i kiraŭnik partyi «Cisa» Pieter Madziar apublikavaŭ adkaz pasolstvu Rasii, jakoje adprečvała paviedamleńni ŚMI pra nibyta znachodžańnie rasijskich palittechnołahaŭ u Budapiešcie z metaj zabiaśpiečyć pieramohu partyi premjer-ministra Viktara Orbana na vybarach, piša «Jeŭrapiejskaja praŭda».

Pieter Madziar. Fota: AP Photo/Denes Erdos

Pra heta Madziar napisaŭ na svajoj staroncy ŭ fejsbuku. Pa jaho słovach, Vienhryja — kraina ludziej, jakija ceniać svabodu, i 12 krasavika, u dzień parłamienckich vybaraŭ, bolšaść hramadzian paćvierdzić žadańnie žyć u volnaj i niezaležnaj dziaržavie bieź źniešniaha ŭpłyvu.

Jon padkreśliŭ, što čakaje ad Rasii pavahi da vienhierskich hramadzian i da suvierenitetu krainy. Madziar zajaviŭ, što budučy ŭrad «Cisy» budzie imknucca da zbałansavanych adnosin z Rasijskaj Fiederacyjaj. Adnačasova jon zaklikaŭ rasijskaje kiraŭnictva ŭstrymacca ad umiašańnia ŭ vybary ŭ vienhierski parłamient i ad pahroz na adras vienhraŭ, padkreśliŭšy padtrymku volnaj, niezaležnaj i demakratyčnaj Vienhryi.

Raniej žurnalisty-rasśledavalniki razam ź jeŭrapiejskimi słužbami biaśpieki paviedamili, što, pavodle ich źviestak, Uładzimir Pucin daručyŭ hrupie palittechnołahaŭ i rasijskaj vajskovaj raźviedcy ŭmiašacca ŭ parłamienckija vybary ŭ Vienhryi ŭ krasaviku, kab dapamahčy pieramozie Orbana.

U pasolstvie Rasii ŭ Budapiešcie ŭ adkaz zajavili, što nijakaja rasijskaja delehacyja ŭ budynku dypmisii nie pracuje.

Raniej prezident Ukrainy Uładzimir Zialenski vykazaŭ spadziavańnie, što partyja Orbana pacierpić parazu na vybarach, paśla čaho stanie mahčymaj narmalizacyja dačynieńniaŭ pamiž krainami.

Kamientary da artykuła