Afrykanski student ź Minska znoŭ trapiŭ u niavykrutku. Ciapier sprava dajšła da ministra justycyi
Afrykanski student Natan Tełafat, viadomy ŭ TikTok pad imiem «Kinh Niamiha», zapisaŭ videazvarot da ministra justycyi Biełarusi. Małady čałaviek kaža, što apynuŭsia ŭ składanaj situacyi paśla kanfliktu z uładalnikami kvatery i prosić razabracca ŭ jahonaj spravie, zaŭvažyła vydańnie «Pieršy». Raniej jon staŭ viadomy paśla taho, jak zdabyŭ prablemy z-za narakańnia na biełaruskija ceny.
Skrynšot ź videa
Historyja chutka razyšłasia pa sacsietkach. U kamientaryjach ludzi pišuć, što kanflikt pačaŭsia paśla pažaru ŭ kvatery, dzie žyŭ student. Tyktok-błohier «Kinh Niamiha» zapisaŭ videazvarot da ministra justycyi Biełarusi Jaŭhiena Kavalenki. U roliku jon kaža, što trapiŭ u składanuju situacyju i prosić razabracca ŭ jaho spravie.
Sa słoŭ studenta, uładalniki kvatery patrabujuć ź jaho kala 110 tysiač rubloŭ za naniesienuju škodu. Sam jon ličyć hetu sumu zanadta vialikaj. Ź videa nie zusim zrazumieła, što mienavita adbyłosia. Ale ŭ kamientaryjach karystalniki pišuć, što ŭ kvatery byŭ pažar, paśla jakoha haspadary žylla zapatrabavali kampiensavać škodu.
Niekatoryja kamientatary śćviardžajuć, što častka hrošaj užo była vypłačana. Sam Tełafat kaža, što ŭ jaho zabrali pašpart i ciapier jon nie moža svabodna pierasoŭvacca i vyjechać z krainy.
Pad videa ŭ tyktoku źjaviłasia šmat roznych kamientaryjaŭ. Adny pišuć:
«Usie biełarusy pakutujuć, u Biełarusi niama spraviadlivaści».
«Top kraina dla studenta».
«Źviarniciesia ŭ milicyju, heta adzinaje vyjście».
«Nu ciapier daviedaŭsia, jakaja demakratyja».
Inšyja ličać, što kali byŭ pažar i naniesienaja surjoznaja škoda, to ŭładalniki kvatery majuć prava patrabavać kampiensacyju. U kamientaryjach pišuć:
«Kvatera mocna vyharała, haspadar padaŭ u sud i ciapier treba kampiensavać škodu».
«Zakon roŭny dla ŭsich».
«Kali spaliŭ kvateru, treba płacić».
«U luboj krainie za takoje vystaviać rachunak».
«Padpaliŭ žyllo — treba kampiensavać».
Raniej błohier užo traplaŭ u padobnuju historyju. Jon raskazvaŭ, što paśla videa pra padaražańnie koka-koły jamu telefanavali ź milicyi i vyklikali na razmovu. Paśla hetaha jamu daviałosia prasić prabačeńnia.
Ciapier student sprabuje pryciahnuć uvahu da situacyi praz sacyjalnyja sietki i zvarot da ministra justycyi.
Natan Tełafat — student z Konha. U tyktoku jon viadomy pad psieŭdanimam «Kinh Niamiha». U svaich rolikach jon raskazvaje pra žyćcio ŭ Biełarusi i pra toje, ź jakimi bytavymi prablemami sutykajecca jak zamiežny student.
Čytajcie taksama:
«Čuvak dzieła skazaŭ». Ludzi masava padtrymali studenta-afrykanca
Minadukacyi choča ŭ razy pavialičyć kolkaść afrykanskich studentaŭ u biełaruskich VNU