MALDZIS vykupiŭ staradaŭni archiŭ parafii z Haradzienščyny
Heta biascennaja krynica infarmacyi pra relihijnaje i śvieckaje žyćcio vakolic Horadni ŭ XIX stahodździ.
7‑ha sakavika inicyjatyva MALDZIS nabyła na aŭkcyjonie ŭ Polščy rukapisny archiŭ pieršaj pałovy XIX stahodździa, jaki pachodzić z parafii niedaloka ad Horadni. Heta vielmi kaštoŭnaja krynica infarmacyi pra tahačasnaje kanfiesijnaje i śvieckaje žyćcio rehijona.
Havorka pra tak zvany kapijaryj — rukapisny zbornik słužbovych dakumientaŭ i pierapiski z kaścioła ŭ Vialikich Ejsmantach, što ŭ Bierastavickim rajonie Haradzienskaj vobłaści.
U zborniku zachavalisia rasparadžeńni śvieckich i kaściolnych uładaŭ, źviestki pra žyćcio parafii i miascovaj supolnaści, traplajucca proźviščy miascovych žycharoŭ, sustrakajucca zhadki pra mietryčnyja akty, asobnyja siamiejnyja historyi, natatki pra vakcynacyju ad vospy, budaŭnictva kaścioła i šmat inšaha.
Bolšaść zapisaŭ naležyć nastajacielu parafii i haradzienskamu dekanu Michału Siezianieŭskamu (1784—1850). Jany vialisia ciaham 14 hadoŭ i datujucca pieršaj pałovaj XIX stahodździa.
«Amal štodzień niedzie ŭ śviecie pradajucca kalekcyjnyja rečy, źviazanyja ź Biełaruśsiu. Ale sustreć u prodažy kaštoŭnaść, vyviezienuju ź biełaruskaj terytoryi, źviazanuju ź joj źmiestam i praz pachodžańnie, kali da taho ž miesca ŭźniknieńnia dakładna viadomaje, — heta sapraŭdnaja redkaść», — kaža kiraŭnik inicyjatyvy Maldzis Pavieł Macukievič.
Rukapisnaja kniha była nabytaja na srodki miecenata inicyjatyvy MALDZIS Illi Pakroŭskaha.
U budučyni kniha ŭ jakaści hramadskaha padarunka vierniecca na svajo miesca — u parafiju imia Najśviaciejšaj Panny Maryi i śviatoha Jana Niepamuka ŭ Vialikich Ejsmantach.
«U hetaj historyi, jak i ŭ inšych prajektach našaj inicyjatyvy, važna, što znajšoŭsia biełarus, jaki prafinansavaŭ vykup rukapisu, kab hety archiŭ nie trapiŭ u pryvatnyja kalekcyi, a viarnuŭsia ŭ Biełaruś u jakaści hramadskaha padarunka», — skazaŭ apiakun inicyjatyvy MALDZIS Ryhor Astapienia.
U najbližejšych płanach MALDZIS — aličbavańnie rukapisnaha zbornika, kab zrabić jaho dasiažnym dla ŭsich zacikaŭlenych historykaŭ i krajaznaŭcaŭ.
Padtrymać MALDZIS možna tut.