Paśla niekalki hadoŭ skaračeńnia ŭ Biełarusi znoŭ stała raści kolkaść ahrasiadzib

U Biełarusi paśla niekalkich hadoŭ značnaha skaračeńnia ŭpieršyniu krychu pavialičyłasia kolkaść ahrasiadzib. Pra heta śviedčać apošnija statystyčnyja źviestki, apublikavanyja Biełstatam, piša Thinktanks.pro.

Zdymak ilustracyjny. Fota z sacsietak błohiera Dzianisa Blišča

Masavaje źmianšeńnie takich abjektaŭ pačałosia ŭ 2021 hodzie paśla ŭzmacnieńnia dziaržaŭnych patrabavańniaŭ. Najbolš surjoznym udaram stała abaviazkovaja pierarehistracyja ŭ 2023 hodzie, jakuju nie prajšła bolš za pałova ahrasiadzib.

Pierarehistracyja była ŭviedziena ŭkazam Łukašenki №351 «Ab raźvićci ahraekaturyzmu». Ułady tłumačyli heta tym, što nieabchodna spynić situacyi, kali pad vyhladam ahrasiadzib faktyčna viaduć hatelny abo restaranny biznes. Jašče adnym uzmacnieńniem pravił stała patrabavańnie z 1 kastryčnika 2024 hoda abaviazkova płacić unioski ŭ Fond sacyjalnaj abarony nasielnictva.

U vyniku kolkaść abjektaŭ ahraekaturyzmu značna skaraciłasia: pavodle Biełstata, z 2021 da 2024 hoda jana źmienšyłasia z 3150 da 1408.

U 2025 hodzie situacyja krychu źmianiłasia. Kolkaść ahrasiadzib pavialičyłasia na 33 abjekty.

Rost adznačany amal va ŭsich rehijonach, akramia Homielskaj vobłaści, dzie ciapier dziejničaje 116 takich abjektaŭ. Najbolš ahrasiadzib znachodzicca ŭ Minskaj vobłaści — kala 480.

Usiaho za 2025 hod u ahrasiadzibach adpačyli kala 427,6 tysiačy čałaviek. Bolšaść ź ich — žychary Biełarusi. U paraŭnańni z papiarednim hodam kolkaść haściej pavialičyłasia prykładna na 44,9 tysiačy čałaviek.

Kamientary da artykuła