Rasijski ŭrad źbirajecca zrezać 10% biudžetu

Rasijski ŭrad abmiarkoŭvaje mahčymaść skaračeńnia vydatkaŭ fiederalnaha biudžetu z-za padzieńnia dachodaŭ i rostu deficytu. Pavodle krynic Reuters, vydatki mohuć być źmienšanyja prykładna na 10% pa bolšaści artykułaŭ, akramia abaronnych i tak zvanych «abaronienych» vydatkaŭ, u tym liku sacyjalnych. Kančatkovaje rašeńnie budzie zaležać ad situacyi z cenami na naftu.

Premjer-ministr Michaił Mišuścin. Fota: Dmitry Astakhov, Sputnik, Government Pool Photo via AP

Pa słovach adnoj z krynic, Ministerstva finansaŭ užo paviedamiła hałoŭnym rasparadčykam biudžetnych srodkaŭ pra nieabchodnaść skaračeńnia vydatkaŭ, i ciapier viedamstvy vyrašajuć, što mienavita možna skaracić. Najpierš mohuć paciarpieć «nieabaviazkovyja» vydatki — naprykład, novyja budaŭničyja prajekty, ramont daroh abo inšyja infrastrukturnyja raboty.

Za studzień—luty fiederalny biudžet Rasii byŭ vykanany z deficytam 3,5 tryljonaŭ rubloŭ (kala 44,17 miljarda dalaraŭ). Dachody skłali 4,76 tryljona rubloŭ (60,08 miljarda dalaraŭ), u toj čas jak vydatki — 8,21 tryljona (103,62 miljarda dalaraŭ). Pastupleńni ad nafty i hazu ŭpali na 47% i dasiahnuli minimumu z časoŭ pandemii — kala 400 miljardaŭ rubloŭ (5,05 miljarda dalaraŭ) u kožnym z dvuch miesiacaŭ. Ahulnyja dachody biudžetu skaracilisia na 11%, niahledziačy na pavyšeńnie PDV i padatkaŭ dla małoha biznesu.

Na fonie kanfliktu vakoł Irana ceny nafty časova vyraśli: Brent dachodziła da 119 dalaraŭ za baral, a rasijskaja Urals — da 75 dalaraŭ. Adnak ekśpierty ličać taki rost niestabilnym i miarkujuć, što vydatki ŭsio adno daviadziecca aptymizavać.

U biudžecie na 2026 hod zapłanavanyja vydatki na sumu 44,1 tryljona rubloŭ (556,61 miljarda dalaraŭ). Ź ich 12,9 tryljona (162,84 miljarda dalaraŭ) pavinny pajści na «abaronu», a razam z vydatkami na biaśpieku — 16,84 tryljona rubloŭ (212,57 miljarda dalaraŭ), abo kala 38% usiaho biudžetu.

Pavodle acenak analitykaŭ, faktyčnyja dachody mohuć akazacca na 3 tryljony rubloŭ (37,87 miljarda dalaraŭ) mienšymi za zapłanavanyja. Kali siaredniaja cana nafty składzie kala 50 dalaraŭ za baral, rasijski biudžet moža niedaatrymać 2 tryljony rubloŭ (25,25 miljarda dalaraŭ) naftahazavych dachodaŭ i jašče kala 1 tryljona (12,62 miljarda dalaraŭ) pa inšych padatkach. U vyniku deficyt moža vyraści da 6,8 tryljona rubloŭ (85,83 miljarda dalaraŭ).

Analityki adznačajuć, što rasijskaje Ministerstva finansaŭ moža adnosna biazbolna skaracić kala 1 tryljona rubloŭ (12,62 miljarda dalaraŭ) — mienavita stolki składajuć vydatki, jakija pakul nie raźmierkavanyja pa kankretnych artykułach.

Kamientary da artykuła