Zdabyča nafty ŭ Rasii ŭpała da minimumu za apošnija 16 hadoŭ

Pavodle pryviedzienych vysokapastaŭlenym čynoŭnikam źviestak, zdabyča nafty ŭ Rasii źnižajecca ŭžo treci hod zapar: u 2022 hodzie jana składała 535 miljonaŭ ton, u 2023‑m — 530 miljonaŭ, u 2024‑m — 516 miljonaŭ. Nižejšyja abjomy fiksavalisia tolki ŭ 2009 hodzie, kali ŭ krainie zdabyvali 494,2 miljona ton. Navat u pandemijnym 2020 hodzie pakazčyk byŭ krychu vyšejšy — 512,7 miljona ton.

Na 2025 hod rasijskim uradam płanavałasia pavieličeńnie zdabyčy da 520 miljonaŭ ton. Bolš za toje, u miežach ździełki APIEK+ Rasii dazvalałasia naraścić zdabyču — sutačnaja kvota vyrasła da 9,57 miljona baralaŭ. Adnak, faktyčna naprykancy hoda zdabyvałasia tolki kala 9,33 miljona baralaŭ na dzień, a ŭ śniežni abjomy niečakana rezka skaracilisia jašče na 250 tysiač baralaŭ štodnia.

Ekśpierty źviazvajuć heta z sankcyjami ZŠA suprać bujnych rasijskich naftavych kampanij, jakija ŭdaryli pa eksparcie ŭ Indyju i Kitaj. Z kanca listapada, kali sankcyi ŭstupili ŭ siłu, kala 35 miljonaŭ baralaŭ nafty zastalisia niepradadzienymi i faktyčna «zaviśli» ŭ tankierach u mory. Pavodle acenak, mahutnaści dla dalejšaha zachoŭvańnia takoj nafty ŭžo vyčarpanyja.

Dadatkovaj prablemaj staŭ rezki abvał cen na rasijskuju naftu Urals — ciapier jana pradajecca pa 35—37 dalaraŭ za baral, što amal na pałovu tańniej za Brent. Praz heta zdabyča na šerahu radoviščaŭ stała stratnaj. Pavodle acenak, prykładna na pałovie naftavych prajektaŭ kampanii stračvajuć kala 5 dalaraŭ z kožnaha pradadzienaha barala. Heta pahłyblaje finansavyja prablemy haliny: prybytki najbujniejšych kampanij užo istotna skaracilisia.

Analityki adznačajuć, što naftavaja halina, jakaja zabiaśpiečvaje kala čverci biudžetnych dachodaŭ i amal pałovu ekspartnaj vyručki Rasii, pastupova ŭvachodzić u kryzis. U 2019 hodzie, na piku, kraina zdabyvała 560 miljonaŭ ton nafty za hod, ale paśla spadu ŭ časy pandemii viarnucca da tych uzroŭniaŭ tak i nie zmahła. Za siem hadoŭ zdabyča skaraciłasia prykładna na 9%, ź jakich amal 5% — užo paśla pačatku vajny.

Pavodle doŭhaterminovaj enierhietyčnaj stratehii Rasii, u iniercyjnym scenaryi zdabyča nafty moža źnizicca da 477 miljonaŭ ton u 2036 hodzie i da 287 miljonaŭ ton u 2050-m. Praz vyčarpańnie starych radoviščaŭ ekspart moža skaracicca ŭtraja — z 234 da 79 miljonaŭ ton na hod.

U jašče bolš niehatyŭnym, «stresavym» scenary, jaki praduhledžvaje ŭzmacnieńnie sankcyj i paskoranuju hłabalnuju admovu ad vuhlevadarodaŭ, da 2050 hoda Rasija budzie zdabyvać tolki kala 171 miljonaŭ ton nafty štohod, a ekspart nafty moža źniknuć całkam.

• 8
• 0
• 4
• 0
• 0
• 0
• 0
• 0