Cichanoŭskaja pryznačyła Mikałaja Kazłova na pasadu ŭ Abjadnanym pierachodnym kabiniecie

Śviatłana Cichanoŭskaja pryznačyła Mikałaja Kazłova na pasadu pradstaŭnika pa adnaŭleńni pravaparadku Abjadnanaha pierachodnaha kabinieta Biełarusi. Rašeńnie pryniata na padstavie rekamiendacyj Kaardynacyjnaj rady, u adpaviednaści z praceduraj, paviedamiła pres-słužba palityka.

Mikałaj Kazłoŭ na sustrečy ź biełaruskaj dyjasparaj. Brusiel, Bielhija. 18 kastryčnika 2025 hoda. Fota: Ofis Śviatłany Cichanoŭskaj

31 studzienia 2026 hoda kiraŭnica APKB nakiravała ŭ Radu prapanovu pa kandydacie na pasadu pradstaŭnika pa adnaŭleńni pravaparadku.

«Liču, što jahony bahaty prafiesijny dośvied u halinie pravaachovy i ŭ hramadska-palityčnaj dziejnaści, aŭtarytet siarod profilnych arhanizacyj, a taksama asabistyja jakaści dazvolać jamu efiektyŭna vykonvać abaviazki na hetaj pasadzie», — pisała Śviatłana Cichanoŭskaja pra Mikałaja Kazłova ŭ liście ŭ Kaardynacyjnuju radu.

12 sakavika Kaardynacyjnaja rada dała zhodu na jaho pryznačeńnie. 

Pasada pradstaŭnika pa adnaŭleńni pravaparadku Abjadnanaha pierachodnaha kabinieta Biełarusi była vakantnaja z 9 žniŭnia 2023 hoda, kali jaje pakinuŭ Alaksandr Azaraŭ. 

Mikałaju Kazłovu — 59 hadoŭ, jon 17 hadoŭ zajmaŭ pasadu staršaha opierupaŭnavažanaha pa asabliva važnych spravach UUS Centralnaha rajona Minska, mieŭ zvańnie padpałkoŭnika milicyi zapasu.

U 2008 hodzie padčas parłamienckich vybaraŭ Kazłoŭ publična zajaviŭ pra falsifikacyi na vybarčym učastku, paśla čaho napisaŭ rapart načalstvu i paviedamiŭ pra incydent niezaležnym ŚMI. Nieŭzabavie paśla hetaha jon pajšoŭ u zapas.

U 2012 hodzie Mikałaj Kazłoŭ ustupiŭ u Abjadnanuju hramadzianskuju partyju, a ŭ 2016 hodzie byŭ abrany namieśnikam staršyni AHP. U 2021 hodzie jaho pazbavili śpiecyjalnaha ranhu padpałkoŭnika milicyi zapasu.

Kazłova dvojčy asudžali pavodle palityčna matyvavanych spraŭ, jon byŭ pryznany palitviaźniem. U žniŭni 2021 hoda jon atrymaŭ try miesiacy aryštu, a ŭ listapadzie 2022‑ha — dva z pałovaj hady pazbaŭleńnia voli za nibyta ŭdzieł u «masavych biesparadkach». Padčas źniavoleńnia nieadnarazova źmiaščaŭsia ŭ karcar i PKT, mieŭ prablemy sa zdaroŭjem, jaho nie adpuścili na pachavańnie maci.

Na volu Mikałaj Kazłoŭ vyjšaŭ 22 lipienia 2024 hoda, u kastryčniku 2025 hoda jon vyjechaŭ ź Biełarusi.

Kamientary da artykuła