Paźniak: Cichanoŭskija i Babaryki — absalutnaje ništo. U ich usio na čužyja hrošy, ad hubnoj pamady da škarpetak
«Jeŭropa pravodzić svaju palityku adnosna Biełarusi. Jana zrabiła hetuju proksi, hetych voś ludziej, jakich finansuje. Kali adbuducca niejkija pieramieny, to tady na śpinie svajho proksi jany spadziajucca zajechać u Biełaruś».
U apošni čas u demakratyčnych kołach Biełarusi ŭ vyhnańni adbylisia peŭnyja pieramieny. Rychtujecca vizit Śviatłany Cichanoŭskaj u Kijeŭ, a Viktar Babaryka vystupiŭ u Jeŭraparłamiencie.
Padčas intervju na «Biełsacie» viadoŭca źviarnuŭ uvahu na hetyja padziei i pacikaviŭsia ŭ Zianona Paźniaka, ci mahčyma siońnia praličyć, chto realistyčna moža ŭziać uładu ŭ Biełarusi.
«Toje, što vy havorycie — heta poŭnaja pustata. Usie Cichanoŭskija, Babaryki — heta absalutnaje ništo. Jany nie majuć ni ŭłady, ni palityčnaha kapitału, ničoha», — emacyjna adkazaŭ vieteran palityčnaha ruchu.
«Jany (jeŭrapiejskija struktury — NN) dajuć hrošy. Ja kazaŭ: ad hubnoj pamady i kančajučy škarpetkami, usio ŭ ich, usio na čužyja hrošy. Adbiarycie ad ich hrošy… Heta NDA (niedziaržaŭnyja arhanizacyi), i ŭsia ichniaja palityka skončyłasia», — davodziŭ palityk.
Što ž tyčycca kantaktaŭ aficyjnaha Kijeva z Ofisam Śviatłany Cichanoŭskaj, to, na dumku Paźniaka, na Zialenskaha byŭ cisk z boku Jeŭropy.
Jak davodzić palityk, jeŭrapiejskija struktury vykarystoŭvajuć biełaruskuju apazicyju jak instrumient dla prasoŭvańnia ŭłasnych intaresaŭ.
«Jeŭropa pravodzić svaju palityku adnosna Biełarusi. Jana zrabiła hetuju proksi, hetych ludziej, jakich finansuje. Jany padtrymlivajuć sankcyi, ahučvajuć niejkija idei jeŭrapiejskija. Ich voziać pa roznych krainach.
I taktyka vielmi prostaja: pa-pieršaje, spasyłajučysia na ich, dušyć biełarusaŭ. Bo što značyć sankcyi? Režymu heta ni pa čym, jon pajšoŭ u Rasiju. Heta ŭ asnoŭnym dziaržavu niščyć.
A pa-druhoje, kali adbuducca niejkija pieramieny — a całkam vidavočna, jany buduć — to tady na śpinie svajho proksi zajechać u Biełaruś, paspryjać demakratyi i ŭsio. I mieć, tak skazać, svaich maryjanietak».
Paźniak paraŭnoŭvaje hetyja mietady z palitykaj ZŠA ŭ dačynieńni da łacinaamierykanskich krain minułaha stahodździa. Adnak, pa jaho mierkavańni, u biełaruskim vypadku hetaja schiema dała zboj.
«Elemientarnaja palityka, tolki davoli takaja hrubaja. Tak heta rabiłasia z Paŭdniovaj Amierykaj, [Złučanyja] Štaty tak rabili. Heta šabłon. Voś hety šabłon zaraz ź Cichanoŭskaj nie spracavaŭ. Nie spracavaŭ, ale jon jašče jość».
Što ž tyčycca Viktara Babaryki, to vieteran demakratyčnaha ruchu ŭpeŭniena zajaŭlaje:
«Chočuć paŭtornuju proksi zrabić z Babaryki, to tut jašče horaj. Tut ničoha ŭžo nie budzie, tamu što heta absalutna adyhranaja karta, taksama bieź ideałohii, bieź ničoha. Heta prosta vykliča śmiech.
Tamu ja nie liču patrebnym surjozna ab hetym havaryć. Tym bolš što biełarusy za hetyja čatyry hady vajny va Ukrainie parazumnieli. Jany ŭžo viedajuć, što heta takoje, što takoje proksi, što takoje Babaryka, što takoje Hazpram, što adbyłosia ŭ 20‑m hodzie. Masa biełarusaŭ užo viedajuć, užo adkrylisia vočy. Jany ŭsio heta viedajuć. A hetyja ludzi byli izalavanyja, jany jašče žyvuć u 20‑m hodzie. Zaraz nie 20‑y hod, 26-y».
Pracesam pieramien u Biełarusi budzie kiravać Amieryka
Na jaho pohlad, los Biełarusi zaležyć ad losu Ukrainy:
«Hałoŭnaje — dapamahać Ukrainie. Ukraina pavinna pieramahčy. I našyja vajary tam pavinny taksama hurtavacca, kab potym pry patrebie pryjści ŭ Biełaruś. Nam nie treba dyvizii. Nam chopić roty».
Jak davodzić Paźniak, na siońnia ŭ Biełarusi niama alternatyŭnaj siły, jakaja mahła b uziać uładu. U takich umovach, na jaho pohlad, całkam realistyčna vyhladaje vieniesuelski scenar, jaki moža być realizavany paśla zaklučeńnia miru pamiž Ukrainaj i Rasijaj:
«Situacyja padobnaja, jak u Vieniesuele. Pakolki režym vyniščyŭ, vytaptaŭ, vyhnaŭ da zvańnia ŭsio, to napeŭna hetym pracesam budzie kiravać Amieryka.
Kali adbudziecca mir na ŭmovach Ukrainy (…), to tady całkam mahčyma, što staŭka budzie zroblena na niejkija koły biurakratyi ci namienkłatury łukašysckaj, jakaja budzie bolš łajalnaja. Jana pieraabujecca, darečy, pierafarbujecca.
I na hetaj asnovie budzie stvaracca niejkaja ŭłada, jakaja budzie bolš libieralnaj. Napeŭna, nie ŭdasca pazbavicca — kali Rasija zastaniecca ŭ sile, — ad Rasii, ale ja nie dumaju, što jana ŭ sile nie zastaniecca. Ale spadziavacca na toje, što raptam niešta źjavicca toje, čaho niama — nie treba, tamu što heta nierealna».
Ale palityk bačyć mahčymaść dla raźvićcia krainy navat pry takim scenary:
«Ale navat takija pieramieny, jakija adbuducca, kali budzie niejkaja bolš libieralnaja namienkłatura, jakaja budzie razumieć, što jany niezaležnaja dziaržava, što jość kultura, što jość nacyjanalnyja intaresy — heta budzie šlach, jaki daść mahčymaść raźvivacca dalej i pryjści, jak kažuć, da narmalnaha vyniku. Tamu heta najbolš realna vyhladaje».
Kamientary
Chaj bieraže jaho boh.
Jaho parady dapamohuć biełarusam vyzvalicca ad rasiejska-jeŭrapiejskaha nieakałanianizma.