Maryi Kaleśnikavaj uručyli premiju Karła Vialikaha
Byłoj palitźniavolenaj Maryi Kaleśnikavaj u niamieckim horadzie Achien uračysta ŭručyli Mižnarodnuju premiju imia Karła Vialikaha. Hetuju ŭznaharodu joj prysudzili jašče ŭ 2022 hodzie, kali jana znachodziłasia ŭ źniavoleńni ŭ Biełarusi. Tamu tady na cyrymonii jaje pradstaŭlała siastra Taćciana Chomič, a siońnia Kaleśnikava atrymała jaje asabista, piša Deutsche Welle.
Maryja Kaleśnikava 13 lutaha 2026 hoda. Fota: Kay Nietfeld picture alliance via Getty Images
Kaleśnikava adznačyła, što navina pra prysudžeńnie premii ŭ toj čas stała dla jaje važnym znakam padtrymki i salidarnaści.
Pavodle kiraŭnika arhkamiteta premii, niamieckaha palityka Armina Łašeta, mahčymaść siońnia vitać byłuju biełaruskuju palitźniavolenuju ŭ Achienie — heta mocny sihnał dla ŭsich, chto vystupaje za svabodu i demakratyju ŭ Jeŭropie.
Mižnarodnaja premija imia Karła Vialikaha ličycca adnoj z najbolš prestyžnych jeŭrapiejskich uznaharod. Jaje z 1950 hoda ŭručajuć ludziam i arhanizacyjam za značny ŭkład u raźvićcio i abjadnańnie Jeŭropy. Siarod łaŭreataŭ u roznyja hady byli viadomyja palityki i hramadskija dziejačy.
U 2022 hodzie hetaj premijaj uznaharodzili lidarak biełaruskaj apazicyi u 2020 hodzie Śviatłanu Cichanoŭskuju, Maryju Kaleśnikavu i Vieraniku Capkału za ich prykład baraćby suprać aŭtarytaryzmu i za demakratyčnyja pieramieny.
Maryju Kaleśnikavu zatrymali ŭ Minsku ŭ vieraśni 2020 hoda, a ŭ 2021‑m asudzili na 11 hadoŭ kałonii. U śniežni 2025 hoda jana vyjšła na volu, była razam ź inšymi viaźniami vydvaranaja z krainy i ciapier žyvie ŭ Hiermanii.