Słonimskaja balnica vybačyłasia za mašynu chutkaj dapamohi, što pryjechała na vyklik da invalida
Administracyja słonimskaj CRB publična prakamientavała situacyju z transpartavańniem invalida pieršaj hrupy na starym miedycynskim aŭtamabili. Fota mašyny, jakaja pryjechała na vyklik, vyklikała chvalu abureńnia ŭ miascovych pablikach.
U słonimskim pabliku źjaviłasia fota mašyny chutkaj dapamohi, što pryjechała na vyklik. Jaje vid aburyŭ kamientataraŭ.
«Nasiłki ź Pieršaj suśvietnaj, napeŭna. Zatoje nadziejnyja!».
«Pakul nie pračytała apisańnie, dumała, što niejki film pra vajnu zdymajuć».
«Śmiech skroź ślozy!!!»
«Hety aŭtamabil — hańba dla sučasnaj krainy. Pavinny być sučasnyja aŭto z usimi vyhodami. Pytańnie: na što iduć našy padatki? Na kaho? Padatkaŭ užo ceły stos».
U balnicy paćvierdzili, što na vyklik pryjechaŭ UAZ 2012 hoda vypusku, technična spraŭny, techničny ahlad dziejničaje da 08.08.2026 h.
«Zavodskaja kamplektacyja aŭtamabila — padłohavyja nasiłki, zamiena jakich na nasiłki inšaha typu (z kołami) nie praduhledžanaja», — havorycca ŭ adkazie ŭstanovy.
Miedyki padkreślili, što aŭtamabil technična spraŭny, a jaho vykarystańnie dla pieravozki pacyjenta było vymušanym krokam. Pavodle ich słoŭ, mašyna zamacavanaja za pryjomnym adździaleńniem dla apieratyŭnaj dastaŭki miedykaŭ pa Słonimskim rajonie, ale ŭ toj dzień astatnija bryhady byli zaniatyja: «Hety aŭtamabil byŭ zadziejničany dla transpartavańnia pacyjenta, bo inšyja mašyny vyjechali ŭ vobłaść: u Hrodna, Navahrudak i Vaŭkavysk».
Administracyja balnicy pryniesła publičnyja prabačeńni za situacyju, a hałoŭny ŭrač asabista źviazaŭsia z aŭtaram skarhi. Što tyčycca palapšeńnia ŭmoŭ, to ŭ CRB adznačyli: «Abnaŭleńnie aŭtaparka ažyćciaŭlajecca pa miery nabyćcia novaha aŭtatranspartu».