Rasija paskardziłasia ŭ JUNIESKA na film, jaki atrymaŭ «Oskara». Kažuć, što nie padumali pra dziaciej

Rasijskaja Rada pa pravach čałavieka źviarnułasia ŭ JUNIESKA sa skarhaj na dakumientalny film «Spadar Nichto suprać Pucina», jaki atrymaŭ premiju «Oskar», piša The Moscow Times.

Kadr ź filma «Spadar Nichto suprać Pucina»

U zvarocie śćviardžajecca, što ŭ stužcy, jakaja pakazvaje, jak u rasijskaj škole paśla pačatku vajny va Ukrainie raspaŭsiudžvałasia pravajennaja prapahanda, mahli być parušanyja pravy dziaciej. U pryvatnaści, havorka idzie pra toje, što videa sa školnikami nibyta vykarystali biez zhody ich baćkoŭ i pieradali trecim asobam dla stvareńnia filma.

U suviazi z hetym rasijski bok prosić pravieryć, ci byli ŭ aŭtaraŭ usie nieabchodnyja dazvoły i ci adpaviadaje karcina etyčnym i pravavym normam.

Film źniali amierykanski režysior Devid Branštejn i były rasijski nastaŭnik Pavieł Tałankin. Mienavita nastaŭnik na praciahu niekalkich hadoŭ fiksavaŭ toje, što adbyvałasia ŭ škole: zaniatki, mierapryjemstvy i inšyja padziei. Paźniej jon vyjechaŭ z Rasii i pieradaŭ hetyja materyjały dla stvareńnia filma.

Na ŭručeńni «Oskara» aŭtary adznačyli, što ich rabota pakazvaje, jak hramadstva moža pastupova stračvać svaju krainu praz maŭčańnie i zhodu z tym, što adbyvajecca. Jany taksama zaklikali spynić vojny i zadumacca pra adkaznaść kožnaha čałavieka.

Akramia «Oskara», film raniej atrymaŭ i inšuju mižnarodnuju ŭznaharodu jak najlepšy dakumientalny prajekt.

Kamientary da artykuła