Na svabodzie — žurnalist Andrej Alaksandraŭ i Iryna Złobina. U źniavoleńni jany ažanilisia

Žurnalist i miedyjamieniedžar Andrej Alaksandraŭ i jaho žonka Iryna Złobina znachodzilisia ŭ źniavoleńni sa studzienia 2021-ha.

Vyzvalenyja palitviaźni Andrej Alaksandraŭ i Iryna Złobina na miažy, 16 vieraśnia 2026. Fota z fejsbuka Asty Andryjaŭskienie

Andrej Alaksandraŭ i Iryna Złobina ŭvajšli ŭ lik tych palitviaźniaŭ, jakija byli vyzvalenyja i vyviezienyja z krainy 16 vieraśnia.

Suviaź z žurnalistam i miedyjamieniedžaram Andrejem Alaksandravym, a taksama ź jaho dziaŭčynaj Irynaj Złobinaj prapała dniom u aŭtorak, 12 studzienia 2021-ha. Paźniej stała viadoma, što abodva zatrymanyja.

Užo praz try dni paśla hetaha MUS rapartavała: «Padazrajucca ŭ finansavańni ekstremisckaj dziejnaści». Pad joj miełasia na ŭvazie apłata štrafaŭ i ŭtrymańnia ŭ CIP ludziam, jakija brali ŭdzieł u pratestach. Pavodle MUS, Alaksandraŭ z 22 žniŭnia da 9 listapada apłaciŭ 250 štrafaŭ, śpisy i hrošy na apłatu štrafaŭ jamu pieradavaŭ fond BY Help.

U čaćvier, 14 studzienia, u ofisie BiełaPAN, namieśnikam hiendyrektara jakoha ŭ 2015—2018 hadach byŭ Alaksandraŭ, prajšoŭ pieratrus, byli kanfiskavanyja vinčestary.

4 krasavika stała viadoma, što ich sprava abjadnanaja razam z abvinavačvańniami na adras Dźmitryja Navažyłava i Iryny Leŭšynaj z «BiełaPAN».

Irynu Złobinu abvinavacili pavodle č. 2 art. 342 (arhanizacyja hrupavych dziejańniaŭ, jakija hruba parušajuć hramadski paradak, i padrychtoŭka albo navučańnie takoj dziejnaści) i č. 1 art. 356 (zdrada dziaržavie).

U Andreja Alaksandrava, akramia hetych artykułaŭ, było jašče dva: č. 1 art. 361‑1 (udzieł u ekstremisckim farmavańni) dy č. 2 art. 243 (uchileńnie ad vypłaty padatkaŭ i zboraŭ).

U kastryčniku 2022 hoda žurnalista asudzili na 14 hadoŭ źniavoleńnia va ŭmovach ahulnaha režymu. Viny Andrej Alaksandraŭ nie pryznaŭ. Adbyvaŭ pakarańnie ŭ navapołackaj papraŭčaj kałonii № 1.

Irynie Złobinaj sud pryznačyŭ 9 hadoŭ źniavoleńnia. Žančyna adbyvała pakarańnie ŭ homielskaj kałonii.

Iryna Złobina i Andrej Alaksandraŭ pabralisia šlubam u SIZA № 1 na vulicy Vaładarskaha 1 vieraśnia 2022 hoda. Raśpisvalisia jany bieź śviedak, pry kanvairach.

Andrej Alaksandraŭ naradziŭsia ŭ 1978 hodzie ŭ Nižnim Tahile. Dziacinstva pravioŭ u Pastavach, tam skončyŭ škołu. Skončyŭ historyka-fiłałahičny fakultet Połackaha dziaržaŭnaha ŭniviersiteta. Atrymaŭ stupień mahistra miedyjamieniedžmientu ŭ Viestminsterskim univiersitecie ŭ Łondanie.

Žurnalisckuju karjeru pačynaŭ u Navapołacku.

U 2009—2012 hadach źjaŭlaŭsia namieśnikam staršyni Biełaruskaj asacyjacyi žurnalistaŭ. Byŭ supracoŭnikam mižnarodnych arhanizacyj Index on Censorship i Article 19.

U 2015—2018 hadach byŭ namieśnikam dyrektara infarmacyjnaha ahienctva BiełaPAN.

Iryna Złobina naradziłasia ŭ 1989 hodzie, skončyła fakultet fiłasofii i sacyjalnych navuk BDU. Apošnija hady zajmałasia svaim nievialikim biźniesam — kvietkami i vytvorčaściu suvieniraŭ.

Sa žniŭnia da listapada 2020 hoda Alaksandraŭ i Iryna supracoŭničali z kraŭdfandynhavaj płatformaj BY_help, jakaja dapamahała ŭdzielnikam pratestaŭ suprać sfabrykavanych prezidenckich vybaraŭ 2020 hoda vypłačvać administracyjnyja štrafy za ŭdzieł u akcyjach. Heta i stała padstavaj dla aryštu ŭ studzieni 2021-ha.

Kamientary da artykuła