Žurnalist Andrej Alaksandraŭ u kałonii schudnieŭ na 40 kiłahramaŭ
Były namieśnik dyrektara BiełaPAN, asudžany na 14 hadoŭ kałonii, adbyvaje pakarańnie ŭ Navapołackaj kałonii, jahonaja žonka Iryna Złobina — u Homielskaj žanočaj.
Andrej Alaksandraŭ znachodzicca ŭ Navapołackaj kałonii № 2 z kanca 2022 hodu. Pavodle svajakoŭ, jon pracuje ŭ cechu drevaapracoŭki, piša Radyjo Svaboda.
«Źbivaje skryni i paddony», — udakładniŭ svajak palitviaźnia.
Pryblizna 7 miesiacaŭ Andrej Alaksandraŭ byŭ pazbaŭleny pieradač i zvankoŭ, u tym liku praz skajp, ale 12 vieraśnia ŭpieršyniu taki zvanok adbyŭsia. Taksama ad Andreja dachodziać listy.
«U mianie ŭsio biez cudaŭ. Stabilna. Radujusia cudoŭnaj śviežaj vosieni», — hetak Andrej apisaŭ svoj emacyjny stan u apošnim liście svajakam.
Pavodle źviestak ad palitviaźnia, jon šmat čytaje, piša vieršy i navat zajmajecca muzyčnaj tvorčaściu.
«U jaho tam jość siabar-muzyka, ź jakim jon piša pieśni na anhielskaj movie», — paviedamiła krynica.
Padčas źniavoleńnia Andrej Alaksandraŭ mocna schudnieŭ.
«Ciapier važyć 80 kiłahramaŭ, a da aryštu mieŭ 120. Raniej kazaŭ, što baleli nohi ad doŭhaha znachodžańnia na bietonie, ale ciapier nie skardzicca. U kałonii rehularna robić fizičnyja praktykavańni», — paviedamiŭ svajak palitviaźnia.
Alaksandrava zatrymali razam ź jahonaj dziaŭčynaj Irynaj Złobinaj u pačatku 2021 hodu i abvinavacili ŭ finansavańni pratestaŭ-2020, a paźniej dadali abvinavačańnie ŭ «zdradzie radzimie». U kastryčniku 2022 hodu žurnalista asudzili na 14 hadoŭ źniavoleńnia va ŭmovach uzmocnienaha režymu. Viny Andrej Alaksandraŭ nie pryznaŭ.
«Stavicca da hetaha kavałku žyćcia jak da pryhody»
Da aryštu Iryna Złobina, jakaja skončyła fakultet fiłasofii i sacyjalnych navuk BDU, zajmałasia biznesam. Jak i Alaksandrava, jaje abvinavacili va ŭdziele ŭ pratestach i zdradzie radzimie. Sud pryznačyŭ Złobinaj 9 hadoŭ źniavoleńnia. Žančyna adbyvaje pakarańnie ŭ Homielskaj kałonii.
«Pracuje, šyje majki. Vykonvaje płan. Uvohule trymajecca małajcom, stavicca da hetaha kavałku žyćcia jak da čarhovaj pryhody», — paviedamiŭ svajak Iryny Złobinaj.
Iryna Złobina i Andrej Alaksandraŭ pabralisia šlubam u SIZA № 1 na vulicy Vaładarskaha 1 vieraśnia 2022 hodu. «Viasna» apublikavała raspovied sukamiernicy Iryny Złobinaj pra toje, što adbyvałasia paśla rośpisu.
«Joj pieradali pryhožuju sukienku čornaha koleru ź vialikimi prazrystymi rukavami i adkrytaj śpinaj. Dziaŭčaty na joj zrabili pierazdymku-tatu ŭ vyhladzie pantery, a taksama pryhožuju fryzuru. Raśpisvalisia jany bieź śviedak, pry kanvairach.
U kamiery Valeryja, Ludmiła i Julija zrabili kanfieci i źbiralisia absypać imi Irynu, kali jana vierniecca z rośpisu. Ale dziaŭčat zabrali na prahułku, a Iryna viarnułasia raniej, tamu jaje prasili, kab paviarnułasia dy zrabiła vyhlad, nibyta zachodzić z rośpisu, a jaje absypali dy vinšavali».
Na Šry-Łancy ŭ 37 hadoŭ pamior biełaruski kinapradziusar Andrej Matałyha4
Kamientary