Irancy ŭpieršyniu ŭ historyi padbili amierykanski samalot F-35

Padčas vajny ź Iranam amierykanski źniščalnik F-35, vierahodna, upieršyniu ŭ historyi moh być paškodžany ahniom praciŭnika. Pavodle infarmacyi CNN, atrymanaj ad dźviuch krynic, samalot atrymaŭ paškodžańni padčas bajavoj misii nad terytoryjaj Irana i byŭ vymušany ździejśnić avaryjnuju pasadku na amierykanskaj bazie na Blizkim Uschodzie. Piłot pry hetym nie paciarpieŭ, a abstaviny zdareńnia ciapier vyvučajucca.

Samalot F-35. Fota: Wikimedia Commons

Jość źviestki, što samalot moh być padbity iranskimi srodkami supraćpavietranaj abarony. Iranskija vajskoŭcy taksama zajavili, što im udałosia trapić u hety źniščalnik i nanieści jamu surjoznyja paškodžańni.

Hety vypadak moža stać pieršym, kali Iran zdoleŭ parazić amierykanski samalot u miežach ciapierašniaha kanfliktu, jaki pačaŭsia naprykancy lutaha. Raniej ZŠA, praŭda, stracili try samaloty, ale ŭsie ich pamyłkova źbiła SPA Kuviejta.

Incydent adbyŭsia na fonie zajaŭ ZŠA pra paśpiachovy chod vajennaj apieracyi i śćviardžeńniaŭ, što iranskaja supraćpavietranaja abarona była značna asłablenaja.

Źniščalniki F-35, košt jakich pieravyšaje 100 miljonaŭ dołaraŭ za adzinku, vykarystoŭvajucca ŭ bajavych dziejańniach jak ZŠA, tak i Izrailem. Raniej jany ŭdzielničali ŭ apieracyjach u inšych krainach, ale vypadkaŭ ich źbićcia praciŭnikam da hetaha času nie fiksavałasia — byli tolki asobnyja avaryi z techničnych pryčyn abo z-za pamyłak piłotaŭ.

Kamientary da artykuła