Lubyja sproby narmalizavać adnosiny z Łukašenkam buduć upiracca ŭ adnu vialikuju prablemu
Na čarhovaj sustrečy z Łukašenkam 19 sakavika Džon Koŭł zakranuŭ pytańnie ab spynieńni novych aryštaŭ: maŭlaŭ, vyzvalajem 10 čałaviek — a jany aryštoŭvajuć jašče 10. Ale heta nie adzinaje pytańnie, jakoje budzie ŭźnikać pry sprobie narmalizavać adnosiny z Łukašenkam.
Džon Koŭł i Alaksandr Łukašenka, 19 sakavika 2026. Fota: Belarusian Presidential Press Service via AP
Starych vypuścić — novych nie sadžać
Pytańnie Koŭła važnaje i łahičnaje, bo inakš situacyja moža pieraŭtvarycca ŭ biznes pa handli zakładnikami.
Biez spynieńnia kryminalnaha palityčnaha pieraśledu ŭnutry krainy kolkaść palitviaźniaŭ u Biełarusi nie budzie nulavoj, praces moža stać biaskoncym.
Adnak pry ciapierašnim tempie sapraŭdy možna ŭjavić situacyju, kali, naprykład, pry kancy 2026 hoda palitviaźniaŭ u Biełarusi nie zastaniecca. Ci prynamsi ich kolkaść budzie vymiaracca adzinkami, a nie sotniami.
Nul palitviaźniaŭ nie roŭna nul represij
Tym nie mienš navat nul palitviaźniaŭ nie budzie aznačać sapraŭdnaj adlihi z poŭnaj amnistyjaj. Pry Łukašenku viartańnie va ŭmoŭny 2019 hod absalutna niemahčymaje. Nijakich niezaležnych ŚMI, NKA, apazicyi i inšych prykmiet demakratyi być nie moža.
Adnak, prynamsi z boku Štataŭ, ciapier vymaloŭvajucca novyja čyrvonyja rysy, sutnaść jakich — nie psavać žyćcio susiedziam i nie pravodzić masavych represij.
Mahčyma, z časam režym Łukašenki sapraŭdy moža być zdolny prytrymlivacca takich umoŭ u abmien na źniaćcie sankcyj i narmalizacyju adnosin. Ale na hetym treku ŭ lubym vypadku ŭźniknie prablema — čarhovyja vybary.
Praviadzieńnie sumlennych vybaraŭ — heta 100% harantyja krachu dla režymu. Tamu nijakich sapraŭdnych vybaraŭ pry im nie budzie, i heta razumiejuć usie: ad ludziej unutry sistemy da amierykancaŭ.
Alaksandr Łukašenka i Uładzimir Pucin 26 lutaha 2026 hoda. Fota: AR
I heta i jość taja prablema, ź jakoj musić sutyknucca luby, chto ciapier hatovy na narmalizacyju adnosin z aficyjnym Minskam.
Pytańnie praviadzieńnia sumlennych vybaraŭ (ličy — adychod Łukašenki ad ułady) — heta toje, što režym nie hatovy abmiarkoŭvać.
Vybary novyja, prablemy staryja
Kali niejkaja kraina idzie na narmalizacyju adnosin z režymam Łukašenki, to praź niekalki hadoŭ — u 2030‑m — jany sutyknucca z hetaj dylemaj: jak vybudoŭvać adnosiny z kiraŭnikom krainy, jaki praciahvaje ŭtrymlivać uładu vyklučna praz falsifikacyju, źniščeńnie apazicyi i represii.
Atrymlivajecca, što ŭ takim klučy staŭleńnie da Biełarusi moža pajści pa turkmienskim, tadžyckim abo azierbajdžanskim scenaryi, kali va ŭładzie znachodzicca aŭtarytarny lidar, a svabodnyja ŚMI i apazicyja adsutničajuć abo pradstaŭleny vielmi abmiežavana. U krainie jość peŭnaja kolkaść palitviaźniaŭ, ale kiraŭniki nie izalavanyja ad cyvilizavanaha śvietu.
Pucin, Łukašenka, Rachmon, Takajeŭ i Žaparaŭ. Fota: Alexander Kazakov Sputnik Kremlin Pool Photo / AP
I tut hałoŭnaje adroźnieńnie Łukašenki ŭ tym, što jon nie tolki ŭzurpiravaŭ uładu, vycisnuŭ ŚMI i całkam źniščyŭ apazicyju. Jon svaimi dziejańniami nie daje spakojna žyć susiednim krainam ES, a ŭ 2022 hodzie jašče i nadaŭ terytoryju krainy dla napadu na Ukrainu.
Jak narmalizoŭvać adnosiny z takim bekhraŭndam — pytańnie, jakoje nie maje prostych adkazaŭ i jakoje niepaźbiežna paŭstanie z novaj siłaj adrazu paśla čarhovaj imitacyi vybaraŭ.