Polskaja kańkabiežka, jakaja na Alimpijadzie atrymała kańkom pad voka, raskazała, jak heta pieražyła

Situacyja z traŭmavańniem polskaj kańkabiežki Kamiły Sielje, jakaja vystupaje ŭ šort-treku, prymusiła zaŭziataraŭ usiaho śvietu zdryhanucca. Ciapier upieršyniu paśla atrymańnia toj traŭmy jana pakazała svoj šnar i raskazała, jak incydent paŭpłyvaŭ na jaje žyćcio, piša Daily Mail.

Kamiła Sielje

Padčas niadaŭnich zimovych Alimpijskich hulniaŭ u italjanskich Miłanie i Karcina d'Ampieca ŭ čverćfinale spabornictvaŭ pa šort-treku na 1500 mietraŭ 25‑hadovaja Kamiła Sielje atrymała surjoznuju traŭmu: kaniok supiernicy razrezaŭ joj tvar. Spartsmienku vynieśli ź lodu na nasiłkach, i ŭsio heta adbyvałasia ŭ žyvym efiry.

Skrynšot videa Daily Brief

Dziaŭčynie zrabili składanuju, ale ŭdałuju apieracyju na vačnicy. Jak adznačajecca, joj jašče pašancavała, bo paškodžańni mahli być i značna ciažejšymi — prynamsi, voka ŭ jaje zastałosia. Raniej Sielje pakazvała tolki «lepšy bok» svajho tvaru, a ciapier vystupiła na polskim telebačańni i adkryta raskazała pra nastupstvy traŭmy.

Kamiła pryznałasia, što ŭ jaje zastaŭsia šnar, a zrok častkova pahoršyŭsia. U vačnicy ŭstalavanaja tytanavaja sietka, taksama jość pierałom kostki pad bryvom. Jana adznačaje, što časta bačyć usio ŭ padvojenym vyhladzie, asabliva kali hladzić uvierch abo ŭniz.

Niahledziačy na heta, spartsmienka nastrojenaja pazityŭna i nie źbirajecca zdavacca. Jana padkreśliła, što joj vielmi dapamahaje padtrymka siamji i ludziej z usiaho śvietu.

Kamiła Sielje z mužam, francuzskim šort-trekistam Dyjanam Sielje

Incydent adbyŭsia paśla sutyknieńnia ź viadomymi zorkami šort-treku, u tym liku italjankaj Aryjanaj Fantana i amierykankaj Krysten Santas-Hrysvałd. Padčas honki spabornictvy prypynili, kab akazać dapamohu paciarpiełaj.

Kamientary da artykuła