Samaje žachlivaje zdareńnie na Alimpijadzie. Polskaja spartoŭka atrymała kańkom u voka
Čverćfinał žanočaha šort-treka na 1500 m na Alimpijadzie ŭ piatnicu skončyŭsia kašmaram — polka Kamiła Sielje trapiła ŭ zavał i atrymała kańkom u voka.
Aściarožna — dalej vielmi niepryjemnyja kadry, jakija mohuć vas šakavać
Sielje ŭpała na adnym z pavarotaŭ, a kaniok supiernicy, jakaja praskokvała mima, trapiŭ joj u tvar. Vyhladała heta nadzvyčaj žudasna. Uvohule šort-trekistki vystupajuć u achoŭnych akularach, ale akulary Kamiły źlacieli jašče padčas sutyknieńnia, piša sports.ru.
Kamile — 25 hadoŭ, jana dvuchrazovaja pryziorka čempijanatu śvietu — 2025 u estafietach. U Miłanie Sielje da ŭznaharod nie dabrałasia, a ciapier uvohule apynułasia ŭ balnicy.
Paśla sutyknieńnia spabornictvy pierapynili, vakoł Kamiły sabralisia daktary. Spartsmienka straciła prytomnaść, ale chutka aprytomnieła. Jaje pakłali na nasiłki, a kali jana pakidała arenu, zmahła pakazać hledačam vialiki palec uharu — usio narmalna, ja ŭ paradku. Tym časam rabotniki saskrabali kroŭ ź lodu.
Amierykanku Krysten Santas-Hrysvołd, jakaja spravakavała zavał, dyskvalifikavali. Jana raspłakałasia, kali joj paviedamili, što zdaryłasia z Kamiłaj.
Prosta na arenie Kamile nakłali niekalki švoŭ.
Na ščaście, najhoršaha nie adbyłosia — voka nie paciarpieła.
«U Kamiły Sielje mocny aciok voka, jana nie moža jaho raspluščyć. Parez na ščace zašyli, paškodžana skułavaja kostka pad vačnicaj. Kamiła razam ź lekaram jedzie ŭ balnicu, čakajem transpart», — raspavioŭ učora pres-ataše polskaj alimpijskaj kamandy Konrad Niadźviedzki.
Zaraz Sielje ŭ balnicy, jaje zdaroŭju ničoha nie pahražaje.
Pakul ža Kamile zastajecca tolki natchniacca prykładam hałandca Jensa Van't Vaŭta — u 2019 hodzie jon pieražyŭ toje ž samaje. Kaniok Uładzisłava Bykanava ź Izraila trapiŭ jamu ŭ tvar — pakinuŭ vialiki šnar i vybiŭ dva zuby. Tady Jensu nakłali 15 švoŭ, ale ŭžo praz dva dni jon viarnuŭsia na lod. A ŭ Miłanie-2026 staŭ trochrazovym alimpijskim čempijonam.
Ciapier čytajuć
Dziaciej-futbalistaŭ z Rečycy pavieźli ŭ Hielendžyk pryfrantovaj vobłaściu Rasii. U aŭtobus papaŭ bieśpiłotnik6
Kamientary