«Heta stała adnym z najlepšych rašeńniaŭ». Rasijanka, jakaja hod tamu pierajechała z Maskvy ŭ Minsk, padzialiłasia svaimi ŭražańniami
«Internet tut pracuje stabilna i paŭsiul, pracujuć usie sacsietki i dadatki, jakija zabaronienyja ŭ Rasii».
Fota: skrynšoty ź videa
Piać plusaŭ žyćcia ŭ Minsku
Anastasija hod tamu pierajechała žyć z Maskvy ŭ Minsk. U svaim błohu ŭ instahramie jana raskazvaje pra plusy, jakija zaŭvažyła.
Pieršaje — heta košt žyćcia.
«Za arendu žytła, za pradukty i navat za kubačak kavy vy budziecie płacić tut našmat mienš», — kaža jana i pryvodzić prykłady z cenami na małočku, jakaja, pa jaje słovach, u Minsku ŭ paŭtara razu tańniejšaja, čym u Maskvie.
Nastupnaj pieravahaj dziaŭčyna nazyvaje internet.
«Aproč taho, što sam internet tut pracuje stabilna i paŭsiul, tut pracujuć usie sacsietki i dadatki, jakija zabaronienyja ŭ Rasii».
Dla Anastasii heta važna, bo jana pracuje addalena.
Treciaje — u Biełarusi zastałosia bolš zachodnich brendaŭ, jaki syšli z Rasii paśla pačatku poŭnamaštabnaj vajny.
«Zara, Bershka, Pull&Bear — usio heta tut zastałosia, a na palicach u kramie vy možacie adšukać Cola abo inšyja pradukty, jakija vy lubili, ale, na žal, jakich ciapier niama ŭ Rasii».
Čaćviortym plusam Anastasija nazyvaje chutkaść. U Maskvie na toje, kab dabracca da siabroŭki, jakaja žyła za 10 km ad jaje, sychodziła 40 chvilin. U Minsku ž jana ŭkładajecca za 20 chvilin, kab prajechać z adnaho punkta ŭ inšy.
«I ty heta duža adčuvalna, bačyš, što času dla žyćcia zastajecca našmat bolš».
Piataj pieravahaj Minska nad Maskvoj jana adznačaje bolš spahadlivych i dobrych ludziej.
«Ale ja taksama źviazvaju heta z tempam žyćcia, bo kali tabie nie treba nikudy biehčy i śpiašacca, to ŭ ciabie zastajecca čas, kab paśmichacca sabie i asiarodździu, ad čaho śviet stanovicca bolš pazityŭnym i dobrym», — ličyć dziaŭčyna.
Pra što spračajucca ŭ kamientarach
U kamientarach pad videa zaviazałasia davoli haračaja dyskusija. Mnohija zaŭvažajuć, što žyć u Minsku tanna, tolki kali pieraličvać na maskoŭskuju zarpłatu.
Taksama šmat chto źviarnuŭ uvahu na toje, što dziaŭčyna pracuje addalena.
«Kali vy pracujecie addalena, to tak, u Biełarusi dobra. Ale kali zachočacie znajści tam vysokaapłatnuju pracu, to heta budzie składana», — napisała adna z kamientatarak.
«Kali vy pracujecie dystancyjna, to tak, tam žyć kamfortna, ale ja ŭ siabie na radzimie zasynaju. Tam usio pavolna, chočacca paskoryć», — napisała biełaruska, jakaja, naadvarot, pierajechała ŭ Rasiju.
Taksama ŭ kamientarach chapaje pytańniaŭ, jak atrymać DNŽ u Biełarusi i ci nie składana rasijaninu tam pracaŭładkavacca.
Nakont atrymańnia DNŽ mnohija pišuć, što heta davoli składanaja pracedura. Što da terminaŭ atrymańnia, to samyja chutkija vyniki — heta 1,5—2 miesiacy, ale ŭ inšych sychodzić pa 3—4 miesiacy.
Niekatoryja žartujuć, što chopić užo rekłamavać Minsk rasijanam, bo jon nie humovy.
Adzin z kamientataraŭ napisaŭ, što, padobna, biełarusy chutka ŭźnienavidziać Pucina za adklučeńnie internetu ŭ Rasii macniej, čym sami rasijanie.