Kureńnie siarod biełarusaŭ robicca ŭsio mienš papularnym

Apytańni, arhanizavanyja dziaržaŭnymi słužbami, śviedčać, što biełarusy pastupova admaŭlajucca ad tytuniu — ciapier kuryć tolki piataja častka darosłych žycharoŭ krainy, piša Thinktanks.pro.

Zdymak ilustracyjny. Fota: «Naša Niva»

U Biełarusi, pavodle apytańniaŭ Nacyjanalnaha statystyčnaha kamiteta, praciahvajecca płaŭnaje źnižeńnie spažyvańnia tytuniu. U 2025 hodzie 21,2% darosłych biełarusaŭ adkazali, što kurać. Heta na paŭpracenta mienš, čym było hodam raniej, i amal na 3 pracentnyja punkty mienš za pakazčyk dziesiacihadovaj daŭniny.

Pry hetym najbolš kurać u vioskach — 23,5% darosłaha nasielnictva. Z rehijonaŭ bolš za ŭsio kureńnie raspaŭsiudžana ŭ Mahiloŭskaj vobłaści — 24,3%, najmienšy pakazčyk — na Hrodzienščynie (18,6%). U horadzie Minsku kurać 20,6% darosłych.

U hrupie moładzi va ŭzroście 16—19 hadoŭ u kureńni tytuniu pryznalisia 3% apytanych — stolki ž, kolki i ŭ papiarednim hodzie. Za dziesiacihadovy pieryjad adbyŭsia radykalny abvał hetaha pakazčyka — u 2016 hodzie tytuń jašče spažyvała 12% junactva. Pierałomnym staŭ nastupny za im 2017 hod, kali pakazčyk upaŭ udvaja — paśla čaho praciahnułasia płaŭnaje źnižeńnie z vychadam u apošnija hady na płato.

Kamientary da artykuła