Biełarusku spynili polskija mytniki pry sprobie pravieźci karał
Pa prapusknym punkcie Terespal pry pierasiačeńni biełaruska-polskaj miažy polskija mytniki znajšli ŭ bahažy hramadzianki Biełarusi vialiki kavałak karałavaha ryfa vahoj bolš za 1,5 kh. Žančyna nie paličyła patrebnym jaho zadekłaravać, paviedamlaje pres-słužba Polskaj mytni.
Fota: lubelskie.kas.gov.pl
Karały adnosiacca da vidaŭ, jakim pahražaje źniknieńnie, tamu jany achoŭvajucca pavodle mižnarodnaj kanviencyi CITES. Dla ich pieravozki praź miažu patrebnyja śpiecyjalnyja dazvoły, jakich u padarožnicy nie było. Sama jana tłumačyła parušeńnie prostym niaviedańniem praviłaŭ, ale heta nie vyzvalaje ad adkaznaści. U vyniku suprać biełaruski raspačali kryminalnuju spravu.
Fota: lubelskie.kas.gov.pl
Mytniki nahadvajuć, što ŭvoz abo vyvaz redkich vidaŭ žyvioł i raślin praź miažu Jeŭrasajuza dazvalajecca tolki z adpaviednymi dakumientami, jakija vydajucca dziaržaŭnymi orhanami. Niezakonny pieravoz takich vidaŭ ličycca złačynstvam i moža karacca pazbaŭleńniem voli ad troch miesiacaŭ da piaci hadoŭ.
Kanviencyja CITES, padpisanaja ŭ 1973 hodzie, nakiravanaja na toje, kab abaranić redkija vidy žyvioł i raślin ad źniščeńnia praź mižnarodny handal.
Čytajcie taksama:
Z Polščy ŭ Biełaruś nie dali ŭvieźci kulturnyja kaštoŭnaści
Biełarus na miažy napaŭ na polskaha mytnika, ratujučy kantrabandnyja cyharety