Likvidavali fond «KinderVita», jaki dapamahaŭ dzieciam z ankałahičnymi zachvorvańniami

Viadomy fond «KinderVita», jaki dapamahaŭ ciažka chvorym dzieciam, spynić svajo isnavańnie. Rašeńnie ab hetym pryniała kalehija hałoŭnaha ŭpraŭleńnia justycyi Minharvykankama, paviedamlaje «Anłajnier».

Kamanda fonda «KindierVita». Fota: kindervita.by

Pradstaŭniki fonda raskazali, što rašeńnie stała dla ich niečakanym. U paviedamleńni, apublikavanym u sacsietkach, jany zapeŭnivajuć, što viali prazrystuju dziejnaść: publikavali hadavyja spravazdačy i abnarodavali danyja pra zbory:

«My nikoli nie dumali, što pryjdziecca paviedamlać takuju navinu. Ale, na žal. 19 sakavika pastanovaj kalehii HUJU Minharvykankama pryniata rašeńnie ab likvidacyi SBU «KinderVita». Dla nas heta poŭnaja niečakanaść. Aficyjnaja farmuloŭka — «u suviazi z ažyćciaŭleńniem dziejnaści, jakaja nie adpaviadaje metam i pradmietu dziejnaści, paznačanym u statucie».

Vy, našy dabračyncy i padpisčyki, viedajecie, jakoj kolkaści dziaciej, što prachodziać lačeńnie ŭ ankacentry, my dapamahli za hety čas. Kolkim padstavili plačo padtrymki ŭ ciažkuju chvilinu. Ź jakoj kolkaściu dziaciej prajšli šlach ad pastanoŭki dyjahnazu da zvonu Zvona remisii. Kolki ŭśmiešak i radaści prynieśli ŭ ankacentr.

Uvieś hety čas my byli sumlennyja pierad saboj i pierad vami. My staralisia, kab vy bačyli, što dapamoha dachodzić pa pryznačeńni. My rychtavali i publikavali tydniovyja, kvartalnyja i hadavyja spravazdačy. Abnarodavali ličby pa kožnym sa zboraŭ. Zaŭsiody z adkrytaj dušoj sustrakali tych, chto chacieŭ stać vałancioram i adčuć pracu «KinderVity» znutry. Na praciahu 5 hadoŭ my pracavali ŭ pravavym poli krainy. My pavažajem jaje zakony, tamu i zaraz, jak by heta ni było baluča, pavinny padparadkavacca patrabavańniam orhanaŭ kiravańnia. Na žal, inakš być nie moža».

U fondzie padkreślili, što ŭsie achviaravańni, jakija znachodziacca na rachunkach, cacki, što zastalisia, i srodki hihijeny buduć raźmierkavany pamiž tymi, chto maje patrebu, i pieradadzienyja ŭ ankacentr.

Žurnalist «Anłajniera» vyrašyŭ prajaśnić situacyju i źviarnuŭsia ŭ hałoŭnaje ŭpraŭleńnie justycyi Minskaha harvykankama, adnak kamientavać situacyju z fondam «KinderVita» ŭ viedamstvie admovilisia.

Fond «KinderVita» zasnavała ŭ 2021 hodzie Nadzieja Mancevič. U 2019 hodzie ŭ jaje dziciaci dyjahnastavali ankałahičnaje zachvorvańnie, i jana vyrašyła stvaryć dabračynnuju arhanizacyju, kab dapamahać chvorym dzieciam. Za hady pracy fond pravioŭ mnostva jarkich akcyj dla dziaciej, jakija znachodziacca ŭ ankacentry. Z majstar-kłasam pierad imi vystupała pieramožca konkursu pryhažości Mrs. Globe Łana Hłumakova, a na praciahu niekalkich hadoŭ dziaciej z Novym hodam vinšavali alpinisty ŭ kaściumach Dziadoŭ Marozaŭ.

Navinu pra likvidacyju mnohija ŭspryniali sa škadavańniem. Voś litaralna niekalki kamientaryjaŭ, pakinutych u akaŭncie «KinderVity» ŭ Instagram:

• «Dziakuj kožnamu z vas za hetyja hady padtrymki. Heta samaje sapraŭdnaje hora dla nas».
• «Vializny vam dziakuj. Asabliva za prajekt «Dzieci zamiest kvietak». Dziakujučy jamu ja zrazumieła, jakija ludzi vakoł dobryja i spahadlivyja. Z vami vyrašać usie pytańni pa arhanizacyi było adno zadavalnieńnie. Vielmi, vielmi škada, što tak składvajucca abstaviny. Davier da vas vielmi vysoki».
• «Abureńniu niama miažy!! Jakaja niespraviadlivaść!! Jak možna zabaranić ludziam rabić takuju dobruju spravu?! Kolki radaści, kolki nadziei ŭ vačach dziaciej było, kali ŭ ankacentr pryjazdžali pradstaŭniki «KinderVity» z žoŭtymi pakietami».
• «Kolki dabra vy zrabili!!! Kolki dzietak i baćkoŭ vam udziačnyja! U heta nie chočacca vieryć… U heta niemahčyma pavieryć».

Kamientary da artykuła