Zasnavalnik dabračynnych fondaŭ dla dapamohi dzieciam Łysiankoŭ dabiehaŭsia — jaho zatrymaŭ DFR
U ludziej uźnikali pytańni jašče da raniejšaha fondu, jakim kiravaŭ Łysiankoŭ i čyich vałancioraŭ možna było sustreć kala CUMa. Ale zatrymali jaho paśla mutnych historyj, źviazanych ź jaho ciapierašnim fondam «Dapamoha ciažkachvorym dzieciam», — niekatoryja siemji nie atrymali całkam hrošy, sabranyja dla ich.
Niekalki hadoŭ tamu «Naša Niva» pisała pra maładoha dyrektara dabračynnaha fondu Viačasłava Łysiankova. Tady jon uznačalvaŭ arhanizacyju «Ruch dušy» — ich vałancioraŭ sa skryniami časta možna było pabačyć kala CUMa. Listy z prośbaj ab dapamozie fond rassyłaŭ i pa rajvykankamach. Ale da fondu ŭ niekatorych uźnikali pytańni. Historyi dziaciej, na jakich źbirałasia dapamoha, časam apisvalisia ahulnymi słovami biez paznačeńnia kankretnaha dyjahnazu, nie było poŭnaj spravazdačy pa atrymanych i patračanych srodkach. A razmova «Našaj Nivy» z Łysiankovym skončyłasia tym, što jon staŭ pahražać milicyjaj za zbor infarmacyi pra jaho dziejnaść. «Ruch dušy» byŭ likvidavany ŭ 2023-m.
U 2024 hodzie Łysiankoŭ stvaryŭ dabračynny fond «Dapamoha ciažkachvorym dzieciam». Ale skončyłasia taksama padazrona — niekatoryja siemji nie atrymali całkam hrošy, sabranyja fondam na ich chvorych dziaciej.
U vyniku 28‑hadovaha Łysiankova zatrymali.
Ciapier śledčaje ŭpraŭleńnie SK pa Minsku rasśleduje spravu kradziažu šlacham złoŭžyvańnia słužbovymi paŭnamoctvami, ździejśnienaha ŭ asabliva bujnym pamiery.
«Tysiačy kalektyvaŭ pa ŭsioj krainie atrymlivali listy z prośbaj akazać materyjalnuju dapamohu, u handlovych centrach i ŭstanovach achovy zdaroŭja rasstaŭlalisia skryni dla achviaravańniaŭ. Varta adznačyć, što najaŭnyja hrošy na rachunak tak i nie zaličvalisia, a ich los u ciapierašni čas ustanaŭlivajecca śledčymi», — paviedamlaje SK.
Dyrektar fondu, pavodle śledstva, skažaŭ infarmacyju ad «padapiečnych» na sajcie arhanizacyi, kab abahacicca samomu.
«Navat kali fond užo akazaŭ dapamohu — hrošy praciahvali pastupać u rasparadžeńnie fihuranta».
Łysiankoŭ taksama byŭ zasnavalnikam troch kamiercyjnych tavarystvaŭ, zarehistravanych na jaho imia, a taksama kiravaŭ jurydyčnaj asobaj, stvoranaj jaho znajomaj.
«U bolšaści vypadkaŭ finansy, što pastupali na rachunak fondu, nie išli na ažyćciaŭleńnie dabračynnaj dapamohi, a tracilisia ŭ poŭnym abjomie na haspadarčyja patreby, kuplu i absłuhoŭvańnie aŭtamabilaŭ, arendu kvatery, nabyćcio techniki, asabistyja bytavyja patreby. Taksama rabiŭsia niezakonny pieravod hrašovych srodkaŭ u najaŭnyja i ich vyvad dla dalejšaha kradziažu».
U vyniku Łysiankovym zacikaviłasia upraŭleńnie DFR KDK pa Minskaj vobłaści i Minsku.
Śledčyja ŭstanavili, što mužčyna vykraŭ zvyš 830 tysiač rubloŭ.
Ciapier jaho abvinavačvajuć pa č. 4 art. 210 (kradziež šlacham złoŭžyvańnia słužbovymi paŭnamoctvami, ździejśnieny ŭ asabliva bujnym pamiery) Kryminalnaha kodeksa. Pa hetym artykule pahražaje pazbaŭleńnie voli na termin ad 5 da 12 hadoŭ sa štrafam i z pazbaŭleńniem prava zajmać peŭnyja pasady abo zajmacca peŭnaj dziejnaściu.
Ciapier čytajuć
U hadavinu śmierci Žanny Fryskie Dźmitryj Šepieleŭ raspavioŭ, čamu nie dazvalaje synu bačycca ź jaje svajakami13
Kamientary