U Biełaviežskaj puščy pieraličyli zubroŭ

U Nacyjanalnym parku «Biełaviežskaja pušča» praviali ŭlik zubroŭ i vyznačyli ich dakładnuju kolkaść, paviedamiła pres-słužba nacparku.

Zdymak ilustracyjny. Fota: Klimaty Padlašša

Pavodle padlikaŭ, ciapier u puščy žyvie 784 zubry — heta na 58 bolš, čym było na pačatku 2025 hoda.

Śpiecyjalisty taksama vyznačyli strukturu papulacyi: 130 samcoŭ, 425 samak, 139 maładych žyviolin va ŭzroście ad 1,5 da 3,5 hoda i 90 cialat hetaha hoda.

Zubry žyvuć u roznych častkach puščy. Kala traciny papulacyi znachodzicca na poŭdni, jašče prykładna čverć — na paŭnočnym uschodzie. Jość taksama nievialiki statak na poŭnačy. Častka žyvioł pieramiaščajecca pamiž rajonami, naprykład, asobnaja hrupa pierajšła na terytoryju Pružanskaha rajona.

Akramia taho, zubroŭ možna pabačyć u śpiecyjalnych valjerach, adkrytych dla naviedvalnikaŭ.

Kamientary da artykuła