Amal tracina pradpryjemstvaŭ u Biełarusi stratnyja

U Biełarusi ŭ pačatku 2026 hoda rezka vyrasła dola stratnych arhanizacyj. Zhodna z danymi Biełstata, pa vynikach usiaho 2025 hoda sa stratami pracavali 13,3% pradpryjemstvaŭ, adnak užo ŭ studzieni 2026 hoda ich dola padskočyła da 31,9%, piša Thinktanks.pro.

Zdymak ilustracyjny. Fota: «Naša Niva»

Dla paraŭnańnia: u studzieni minułaha hoda pakazčyk składaŭ 25,1%. Heta značyć, za hod jon vyras adrazu na 6,8 pracentnych punkta.

Pry hetym na praciahu 2025 hoda situacyja pastupova palapšałasia. Paśla studzieńskich 25,1% dola stratnych arhanizacyj źnižałasia amal uvieś hod: da 20% viasnoj, 16,2% letam i 13,3% da śniežnia. Adnak novy hod pačaŭsia z rezkaha paharšeńnia finansavych vynikaŭ pradpryjemstvaŭ.

Samaja vysokaja dola stratnych kampanij u studzieni 2026 hoda zafiksavanaja ŭ Minsku (36,9%). Dalej iduć:

• Minskaja vobłaść — 32,1%;
• Hrodzienskaja vobłaść — 31,7%;
• Bresckaja vobłaść — 30,8% (taksama vyšej za siaredni ŭzrovień).

Najmienšaja dola stratnych arhanizacyj siarod nazvanych rehijonaŭ — u Viciebskaj vobłaści, dzie jana skłała 25,5%.

Kali hladzieć nie tolki na kolkaść prablemnych pradpryjemstvaŭ, ale i na vieličyniu ich strataŭ, to najbolš ciažkaja situacyja skłałasia ŭ Homielskaj vobłaści. Tam siarednija čystyja straty na adnu stratnuju arhanizacyju skłali 487,6 tysiačy rubloŭ. Dalej iduć Minsk (427,3 tysiačy rubloŭ) i Minskaja vobłaść (394,5 tysiačy rubloŭ).

Siaredni pakazčyk pa Biełarusi składaje 380,0 tysiač rubloŭ. Najnižejšymi straty byli ŭ pradpryjemstvaŭ u nastupnych abłaściach:

• Hrodzienskaja — 332,4 tysiačy rubloŭ;
• Mahiloŭskaja — 327,9 tysiačy rubloŭ;
• Viciebskaja — 295,0 tysiač rubloŭ;
• Bresckaja — 276,4 tysiačy rubloŭ.

Kamientary da artykuła