Iranskija lidary amal nie kamunikujuć pamiž saboj praz strach prasłuchoŭvańnia i likvidacyi

Jak piša The New York Times, u kiraŭnictvie Irana ciapier uźnikła surjoznaja prablema z unutranaj kamunikacyjaj: vysokapastaŭlenyja čynoŭniki i siłaviki amal pierastali kantaktavać pamiž saboj.

Viarchoŭny lidar Irana Madžtaba Chamieniei, jakoha paśla abrańnia na pasadu ni razu nie pakazali. Fota: Getty Images

Hałoŭnaja pryčyna takoj situacyi — strach pierad prasłuchoŭvańniem i rakietnymi ŭdarami, jakija mohuć paśla hetaha adbyvacca.

Pavodle infarmacyi zachodnich raźviedsłužbaŭ, šerah iranskich lidaraŭ byli likvidavanyja mienavita paśla pierachopu ich pieramoŭ abo padčas sustreč u adnym miescy. Tamu ciapier čynoŭniki paźbiahajuć jak telefonnych razmoŭ, tak i asabistych sustreč.

Heta pryviało da razdroblenaści ŭłady i parušeńnia kaardynacyi. Choć dziaržaŭnyja i vajskovyja struktury praciahvajuć pracavać, im ciažka vypracoŭvać ahulnuju stratehiju i prymać uzhodnienyja rašeńni, u tym liku adnosna vajny i mahčymych pieramoŭ.

Situacyja ŭskładniłasia ŭ vyniku hibieli viarchoŭnaha lidara Ali Chamieniei. Jahony syn i pierajemnik Madžtaba Chamieniei nie źjaŭlajecca publična i niezrazumieła, nakolki jon kantraluje ŭładu. Častka analitykaŭ miarkuje, što realnyja rašeńni ŭ Iranie ciapier mohuć prymać pradstaŭniki Korpusa vartavych isłamskaj revalucyi.

Na hetym fonie Donald Tramp zajaviŭ, što ŭ Iranie nibyta adbyłasia faktyčnaja źmiena ŭłady, a ZŠA viaduć pieramovy ŭžo z «inšaj hrupaj ludziej». Adnak niezrazumieła, chto mienavita pradstaŭlaje iranski bok i ci zdolnyja hetyja ludzi ŭzhadniać pazicyju ŭnutry krainy.

U vyniku Iranu stanovicca ŭsio ciažej vieści pieramovy i kaardynavać svaje dziejańni. Adsutnaść suviazi pamiž kiraŭnikami moža jašče bolš uskładnić jak vajennyja rašeńni, tak i mahčymyja sproby damovicca pra spynieńnie kanfliktu.

Kamientary da artykuła