Nakolki pravamiernyja dziejańni milicyi? Na sajcie kalehii advakataŭ spytali pra «Hukańnie viasny» ŭ Homieli
Adkazy advakataŭ byli łakaničnymi.
Ilustracyjny zdymak
Na sajcie Biełaruskaj respublikanskaj kalehii advakataŭ «Fłahštok» zaŭvažyŭ pytańnie žychara Homiela ab pravamiernaści dziejańniaŭ milicyi pry zatrymańni žančyny za «Hukańnie viasny».
U rubrycy «Jurydyčnaja anłajn-kansultacyja» advakatam zadali takoje pytańnie:
«Dačka paŭdzielničała ŭ abradzie «Hukańnie viasny» ŭ Homieli, arhanizavanym restaranam «Spadčyna». Praź niekalki dzion paśla hetaha da nas dadomu źjavilisia supracoŭniki RAUS i zabrali dačku ŭ adździeł dla praviadzieńnia prafiłaktyčnaj pracy. Z-za hetaha była sarvanaja jaje praca ŭ kaledžy. Pratrymaŭšy dačku ŭ RAUSie kala vaśmi hadzin, joj patłumačyli, što jana ŭdzielničała ŭ niesankcyjanavanym mierapryjemstvie. Nakolki pravamocnyja dziejańni supracoŭnikaŭ pravaparadku?»
Advakat Kryścina Jakuta-Marčuk adkazała koratka, nie prakamientavaŭšy pytańnie ab pravamiernaści dziejańniaŭ milicyi:
«Kali byli padstavy, mahli i zatrymać. I rastłumačyć taksama mahli. Treba hladzieć, jak usio afarmlałasia».
Aŭtar pytańnia dadaŭ kamientar:
«Dačka ŭ milicyi znachodziłasia z vaśmi ranicy da 16:00. Čakańnie razboru 6 hadzin i tak zvanaja prafiłaktyčnaja hutarka 2 hadziny. Dvoje supracoŭnikaŭ ź joj parazmaŭlali i vydali daviedku ab pryčynie adsutnaści na pracy. Bolš nijakich dakumientaŭ nie dali. Joj rastłumačyli, što jana pavinna była vyśvietlić sama, ci jość u restarana dazvoł na praviadzieńnie mierapryjemstva. Nakolki pravilnyja dziejańni supracoŭnikaŭ milicyi?»
Hetaje pytańnie zastałosia biez adkazu.
Čytajcie taksama:
U homielskim restaranie zatrymali ŭdzielnikaŭ «Hukańnia viasny». Im dajuć sutki i bujnyja štrafy