Viaskoviec abrazaŭ vałasy 80‑hadovaj maci i prymušaŭ jaje jeści
Žychara Vaŭkavyskaha rajona buduć sudzić za katavańnie maci.
Na praciahu troch dzion jon žorstka ździekavaŭsia z žančyny — źbivaŭ i navat abrezaŭ vałasy, a zatym pakinuŭ u biezdapamožnym stanie. Sa šmatlikimi traŭmami piensijanierku špitalizavali. Kanflikt adbyŭsia ŭ śniežni minułaha hoda, raspaviali ŭ prakuratury.
Mužčyna zapatrabavaŭ u 80‑hadovaj maci hrošy — patracić ich płanavaŭ na ałkahol. Atrymaŭšy admovu, jon pačaŭ źbivać žančynu: biŭ pa hałavie humovym šlopancam i kułakami.
Na nastupny dzień kanflikt adnaviŭsia. Paśla adnaho z udaraŭ u hałavu žančyna ŭpała. Nie akazaŭšy joj dapamohu, mužčyna pajšoŭ z domu.
«Viarnuŭšysia na nastupny dzień, jon pabačyŭ jaje na padłozie na tym ža miescy. Kali žančyna pačała paŭźci da stacyjanarnaha telefona dla vykliku dapamohi, syn uziaŭsia za mižpakajovyja dźviery i ź siłaj staŭ jaje začyniać, naniosšy niekalki ŭdaraŭ pa nazie.
Zatym jon abrezaŭ kancylarskimi nažnicami vałasy maci, jakija staŭ zapichvać joj u rot z patrabavańniem źjeści, paśla čaho nanios pa hałavie ŭdary humovym tapkam z draŭlanaj kałodkaj», — paviedamili padrabiaznaści zdareńnia ŭ viedamstvie.
Piensijanierku znajšli susiedzi, jany ž vyklikali chutkuju. Miedyki kanstatavali zakrytuju ČMT, množnyja pierałomy rebraŭ, levaj ściehnavoj kostki, cialesnyja paškodžańni hałavy, tułava, ruk i noh.
Mužčyna zatrymany, kryminalnaja sprava nakiravanaja ŭ sud. Maksimalnaje pakarańnie da 10 hadoŭ pazbaŭleńnia voli.