U Šviecyi tankier rasijskaha cieniavoha fłotu zatrymali za raźliŭ nafty

U Šviecyi zatrymali tankier «cieniavoha fłotu» Rasii pad nazvaj Flora 1, jaki padazrajuć u raźlivie nafty ŭ Bałtyjskim mory kala vostrava Hotłand. Heta pieršy taki vypadak u rehijonie, kali sudna zatrymali praz mahčymuju ekałahičnuju škodu, piša Deutsche Welle.

Tankier Flora 1. Fota: vesselfinder.com

Naftavaja plama daŭžynioj kala 12 kiłamietraŭ była vyjaŭlena 2 krasavika. Paśla hetaha padazreńni ŭpali na hety tankier i ŭłady pačali rasśledavańnie. Na borcie znachodziacca 24 čałavieki ekipaža.

Paviedamlajecca, što pierad incydentam sudna źmianiła kurs u bok terytaryjalnych vod kala Kalininhrada, a potym viarnułasia ŭ mižnarodnyja vody. Jaho kančatkovy punkt pryznačeńnia nieviadomy, a sistema adsočvańnia ŭ niejki momant była adklučanaja.

Raniej hety tankier užo padazravali ŭ parušeńniach: jon moh adklučać sistemy identyfikacyi i pierahružać naftu ŭ mory, kab abychodzić sankcyi. Sudna źviazvajuć z kampanijami, jakija ŭdzielničajuć u pieravozcy rasijskaj nafty ŭ abychod abmiežavańniaŭ.

Suprać Flora 1 užo ŭviedzienyja sankcyi šeraham krain, u tym liku dziaržavami Jeŭropy i inšymi partniorami. Ciapier ułady Šviecyi vyvučajuć, ci sapraŭdy tankier datyčny da raźlivu nafty i parušeńnia ekałahičnych normaŭ.

Kamientary da artykuła