Z 1 vieraśnia va ŭsim minskim naziemnym transparcie možna budzie raźličycca kartkaj

U Minsku płanujuć uvieści mahčymaść apłaty bankaŭskaj kartkaj va ŭsim naziemnym hramadskim transparcie da 1 vieraśnia 2026 hoda. Pra heta paviedamiła namieśnica staršyni kamiteta ekanomiki Minharvykankama Volha Lavoška, piša BiełTA.

Fota z sacsietak

Takuju sistemu ŭžo častkova vykarystoŭvajuć: u mietro jana pracuje daŭno, a ŭ 2025 hodzie jaje testavali na asobnych aŭtobusnych i tralejbusnych maršrutach. Ciapier idzie zakupka nieabchodnaha abstalavańnia dla ŭsiaho transpartu.

Paśla poŭnaha zapusku sistemy płanujecca admianić prodaž biletaŭ u kiroŭcaŭ. Heta značyć, što apłacić prajezd možna budzie praz validatar z dapamohaj bankaŭskaj karty abo inšymi bieznajaŭnymi sposabami.

Jašče adna pieravaha — krychu mienšaja cana prajezdu. Zaraz, kali kuplać bilet abo apłačvać praz terminał, prajezd kaštuje tańniej, čym pry apłacie ŭ kiroŭcy. Pry rehularnych pajezdkach hetaja roźnica moža być adčuvalnaj.

Kantrol apłaty taksama budzie prosty: pry praviercy pasažyr pavinien prykłaści svaju kartku da śpiecyjalnaj pryłady kantralora, i sistema pakaža, ci apłačany prajezd.

Akramia taho, adnoj kartkaj možna apłacić prajezd adrazu za niekalkich čałaviek — sistema prosta zafiksuje niekalki apłat zapar, i budzie ličycca, što ŭsie pasažyry jeduć z kvitkami.

Kamientary da artykuła