Jak vyratavali druhoha lotčyka amierykanskaha źniščalnika F-15 z hłybini Irana? Stali viadomy detali apieracyi
Jon chavaŭsia ŭ harach u čakańni dapamohi, majučy sa zbroi tolki pistalet.
Abłomki F-15 i katapultnaje kresła. Fota: iranskija ŚMI, KVIR
Amierykanski samalot F-15E Strike Eagle byŭ źbity nad Iranam 3 krasavika. Dva členy ekipaža katapultavalisia z kabiny. Pieršaha lotčyka chutka vyratavali, ale druhoha adrazu znajści nie ŭdałosia.
Jon chavaŭsia ŭ harach, majučy sa zbroi tolki pistalet. Jaho pošuk byŭ najvyšejšym pryjarytetam amierykanskich vajskoŭcaŭ na praciahu apošnich 48 hadzin.
Detali vyratavalnaj apieracyi apisvaje The New York Times.
U misii pa vyratavańni zadziejničali sotniu śpiecnazaŭcaŭ, dziesiatki amierykanskich vajennych samalotaŭ, viertalotaŭ i inšyja mahčymaści.
Amierykanskija ŭdarnyja samaloty skidali bomby i adkryvali ahoń pa iranskich kałonach, kab nie dapuścić ich da rajona, dzie chavaŭsia lotčyk. Kali amierykanskija siły nablizilisia da svajho aficera, uspychnuła pierastrełka.
U lotčyka pry sabie byŭ majak i pryłada biaśpiečnaj suviazi dla kaardynacyi z vyratavalnaj misijaj. Vysokapastaŭleny vajenny čynoŭnik ZŠA nazvaŭ hetu misiju adnoj z samych składanych i kompleksnych u historyi amierykanskich śpiecyjalnych apieracyj.
Paśla taho jak aficera vyratavali, dva transpartnyja samaloty, jakija pavinny byli dastavić jaho i vajennych u biaśpiečnaje miesca, zachraśli na addalenaj bazie ŭ Iranie. Jany byli paškodžanyja. Kamandavańnie vyrašyła nakiravać try novyja samaloty dla evakuacyi ŭsiaho amierykanskaha vajennaha piersanału, a dva paškodžanyja padarvali, kab jany nie patrapili ŭ ruki irancaŭ.
Heta adbyvałasia ŭ harach na paŭdniovym zachadzie Irana, dzie isnuje značnaja apazicyja da iranskaha ŭrada.
Pa infarmacyi inšych ŚMI, vyratavany aficer ciapier znachodzicca ŭ biaśpiecy na terytoryi Kuviejta. Usie amierykanskija siły pakinuli pavietranuju prastoru Irana. U apieracyi dapamahaŭ taksama Izrail.
Pra paśpiachovaje zaviaršeńnie misii abvieściŭ taksama Donald Tramp.