Tramp zajaviŭ pra ŭnikalnaje vyratavańnie abodvuch piłotaŭ F-15 z hłybini iranskaj terytoryi
Prezident ZŠA Donald Tramp abviaściŭ pra zaviaršeńnie nadzvyčaj składanaj pošukava-ratavalnaj apieracyi ŭ iranskich horach. Pavodle jaho słoŭ, amierykanskim vajskoŭcam udałosia viarnuć abodvuch piłotaŭ źniščalnika, źbitaha ŭ minułuju piatnicu. Hetuju padzieju Tramp nazvaŭ histaryčnaj pieramohaj amierykanskaj zbroi.
Tramp paviedamiŭ u svajoj sacsietcy Truth, što druhi piłot užo znachodzicca ŭ biaśpiecy. Raniej infarmacyja pra los ekipaža trymałasia ŭ sakrecie, kab nie sarvać misiju, dadaŭ jon.
Pavodle prezidenta ZŠA, heta pieršy vypadak u vajskovaj historyi, kali dvuch piłotaŭ udałosia vyratavać paasobku z hłybokaha tyłu praciŭnika.
Sa słoŭ Trampa, u vyratavalnaj apieracyi ŭdzielničali «dziasiatki samalotaŭ, uzbrojenych samaj śmiarotnaj zbrojaj u śviecie». Piłot žyvy, choć i atrymaŭ traŭmy, zajaviŭ Tramp.
Jon adznačyŭ, što vajskoŭcy sutkami sačyli za pieramiaščeńniem piłota, pakul iranskija siły sprabavali jaho vysačyć u ciažkadastupnych harach. Nivodzin amierykanski vajskoviec nie zahinuŭ i nie atrymaŭ ranieńnia padčas abiedźviuch apieracyj.
Svoj dopis Tramp skončyŭ vinšavańniem ź Vialikadniem i napaminam, što ZŠA «nikoli nie pakidajuć svaich bajcoŭ».
Aficyjny Tehieran pakul nie kamientuje zajavy pra pracu amierykanskaj avijacyi ŭ hłybini svajoj terytoryi.
Učora paviedamlałasia, što ZŠA viaduć pošuki druhoha piłota F-15, źbitaha nad Iranam 3 krasavika. Iran, u svaju čarhu, abjaviŭ uznaharodu ŭ 60 tysiač dołaraŭ za zachop «varožaha lotčyka».
Chto zabaraniaje ŭ Biełarusi knihi — voś hetyja 22 čałavieki33
Kamientary
S PZRK jeho śbili, a nie pri pomoŝi PVO.