Iran spyniŭ pramyja pieramovy z ZŠA paśla rezkich zajaŭ Trampa

Iran spyniŭ pieramovy z ZŠA paśla rezkich zajaŭ Donalda Trampa, jaki pryhraziŭ źniščyć «iranskuju cyvilizacyju». Pavodle infarmacyi The New York Times, Tehieran praz Pakistan jak pasiarednika pieradaŭ, što bolš nie budzie abmiarkoŭvać pytańnie spynieńnia ahniu.

Zdymak ilustracyjny. Fota: AP Photo/Francisco Seco

Pry hetym udakładniajecca, što Iran razarvaŭ mienavita pramyja kantakty z ZŠA, ale praciahvaje pieramovy praz pasiarednikaŭ. Tym nie mienš, taki krok uskładniaje dasiahnieńnie damoŭlenaściaŭ.

Iranskija pradstaŭniki zajaŭlajuć, što nie buduć iści na kampramisy, pakul Vašynhton patrabuje ad ich faktyčnaj kapitulacyi. Heta razhladajecca jak sihnał pratestu i niepadparadkavańnia z boku Tehierana.

Taksama paviedamlajecca, što Iran pieradaŭ praz Katar papiaredžańnie: u vypadku ŭdaraŭ ZŠA pa enierhietyčnaj infrastruktury mohuć nastupić surjoznyja nastupstvy dla ŭsiaho rehijona. U pryvatnaści, havorycca pra mahčymyja ataki ŭ adkaz, jakija mohuć pakinuć biez elektryčnaści šerah krain, uklučajučy Saudaŭskuju Araviju, a taksama pra ryzyku błakavańnia jašče adnaho važnaha marskoha šlachu — Bab-el-Mandebskaha praliva, jaki zakryvaje dostup da Čyrvonaha mora.

Niahledziačy na žorstkija publičnyja zajavy, pavodle niekatorych krynic, za kulisami ŭsio ž naziraŭsia peŭny prahres u pieramovach.

Akramia inšaha, Iran abvinavaciŭ Trampa ŭ namiery ździejśnić vajennyja złačynstvy. Unutry krainy ludzi vychodziać na akcyi, utvarajučy «žyvyja łancuhi» vakoł važnych abjektaŭ, kab padkreślić, što ŭdary pa enierhietyčnaj infrastruktury niedapuščalnyja.

Kamientary da artykuła