Sietka kaviarniaŭ vypuściła kubački pad Hod biełaruskaj žančyny. Ale abyšłasia bieź biełarusak
U sietcy kaviarniaŭ «Chotfiks» vyrašyli aryhinalna adreahavać na abjaŭleny ŭładami Hod biełaruskaj žančyny — «hod siły, talentu, natchnieńnia, biaskoncaj źniešniaj i ŭnutranaj pryhažości». Jany vypuścili pad heta limitavanuju sieryju kubačkaŭ z žanočymi matyvami.
Tvarami kubačkaŭ stali «vialikija žančyny, jakija źmianiali śviet, natchniali pakaleńni i dakazvali, što mahčymaści nie majuć miežaŭ». Usiaho takich nabrałasia šeść, ale čamuści pry hetym nivodnaj biełaruski. Tolki pieršaja ŭ śviecie kasmanaŭtka, rasijanka Valancina Cieraškova, źviazanaja z našaj krainaj prynamsi ŭskosna, bo ź Biełarusi pachodzili jaje baćki.
Inšyja hieraini — mieksikanskaja mastačka Fryda Kało, brytanskaja pryncesa Dyjana, francuzskaja madeljerka Kako Šanel, amierykanskaja lotčyca Amielija Erchart i polska-francuzskaja vučonaja, dvuchrazovaja łaŭreatka Nobieleŭskaj premii Maryja Składoŭskaj-Kiury.
Tym nie mienš, jak zapeŭnivajuć biełarusak u «Chotfiksie», prajekt «pra vas. Pra kožnuju biełaruskuju žančynu, jakaja kožny dzień stvaraje, kłapocicca, viadzie napierad, maryć i nie zdajecca».
Sietka Hotfix pracuje ŭ niekalkich haradach Biełarusi, u tym liku ŭ Minsku, Breście, Baranavičach, Hrodnie, Lidzie i Maładziečnie.