Pieter Madźjar nie vyklučyŭ pieramovaŭ z Pucinym

«Nam daviadziecca sieści za stoł pieramovaŭ z rasijskim prezidentam. Hieahrafičnaje stanovišča ni Rasii, ni Vienhryi nie źmienicca», — zajaviŭ jon.

Pieter Madźjar. Fota: Darco Bandic / AP

Novy ŭrad Vienhryi budzie vieści pieramovy z prezidentam Rasii Uładzimiram Pucinym, zajaviŭ lidar apazicyjnaj partyi «Cisa», jakaja lidziruje na parłamienckich vybarach, Pieter Madźjar.

«Nam daviadziecca sieści za stoł pieramovaŭ z rasijskim prezidentam. Hieahrafičnaje stanovišča ni Rasii, ni Vienhryi nie źmienicca. Naša enierhietyčnaja zaležnaść taksama zastaniecca jašče niekatory čas. Nieabchodna ŭzmacniać dyviersifikacyju, ale heta nie adbudziecca imhnienna. Pry nieabchodnaści my budziem vieści pieramovy, ale siabrami my nie staniem», — skazaŭ Madźjar.

Tak palityk prakamientavaŭ słovy ciapierašniaha premjer-ministra Viktara Orbana, jaki papiaredžvaŭ, što «Cisa» ŭ vypadku pieramohi na vybarach sfarmiruje «praŭkrainski ŭrad», i abiacaŭ sačyć za jaje pieramovami z Maskvoj.

Madźjar u tym ža intervju zaklikaŭ pastavicca da hetaha pytańnia biez žartaŭ i vykazaŭ sumnieŭ, što Orban zrabiŭ hetuju zajavu surjozna. «Nichto nie choča praŭkrainskaha ŭrada ŭ Vienhryi. Usie chočuć pravienhierskaha», — rastłumačyŭ jon.

Paśla apracoŭki 98,9% hałasoŭ «Cisa» atrymlivaje 138 miescaŭ u parłamiencie, što daje joj kanstytucyjnuju bolšaść, a kiroŭny aljans FIDES—VDNP — tolki 55 miescaŭ. Jašče šeść miescaŭ dastajucca partyi «Naša kraina».

Kamientary da artykuła