U Biełarusi raspracavali lekavyja plonki, jakija mohuć zamianić tabletki i ŭkoły

Maładyja navukoŭcy Biełaruskaha dziaržaŭnaha ŭniviersiteta stvaryli novy vid lekavych srodkaŭ — śpiecyjalnyja plonki, jakija rastvarajucca ŭ rocie. Jany vyhladajuć jak tonkija pałoski i ŭtrymlivajuć vitaminy, raślinnyja dabaŭki abo leki, piša sb.by.

Asablivaść hetaj raspracoŭki ŭ tym, što dziejnaje rečyva traplaje ŭ arhanizm adrazu praź ślizistuju abałonku rota, abminajučy straŭnik i piečań. Dziakujučy hetamu efiekt nastupaje vielmi chutka. Plonki rastvarajucca za niekalki siekund i nie patrabujuć zapivańnia vadoj.

Taki farmat asabliva zručny ŭ situacyjach, kali patrebnaja chutkaja dapamoha — naprykład, pry boli, alerhii, kašli, dyjarei abo marskoj chvarobie. Taksama jon pasuje dzieciam, pažyłym ludziam i tym, chto maje ciažkaści z hłytańniem.

Raspracoŭščyki adznačajuć, što hetyja plonki mohuć stać alternatyvaj zvyčajnym tabletkam, siropam i ŭkołam, jakija nie zaŭsiody zručnyja abo majuć abmiežavańni ŭ vykarystańni.

Pry vytvorčaści vykarystoŭvajucca bijaraskładalnyja materyjały, što adpaviadaje pryncypam ekałahičnaj chimii. Technałohija ŭžo prystasavanaja da pramysłovaha vypusku, choć u Biełarusi takich vytvorčaściaŭ pakul niama, tamu prajekt ličycca ŭnikalnym.

Ciapier navukoŭcy pracujuć nad pašyreńniem składu i palapšeńniem smaku plonak, bo niekatoryja kampanienty majuć horki prysmak. Užo stvoranyja varyjanty z supraćvirusnym, supraćalerhičnym, supraćdyjarejnym dziejańniem, a taksama srodki, što dapamahajuć pry kašli.

Raspracoŭku zrabili maładyja daśledčycy Taćciana Biaznosik i Maryja Hunovič razam z navukovymi kiraŭnikami Dźmitryjem Hrynšpanam i Maryjaj Savickaj. Prajekt užo atrymaŭ vysokuju acenku na konkursie miedycynskich startapaŭ, i im zacikavilisia biełaruskija farmaceŭtyčnyja pradpryjemstvy. Heta daje šaniec, što ŭ budučyni takija plonki pačnuć vypuskać i šyroka vykarystoŭvać.

Kamientary da artykuła