U Navahrudku razburajuć klaštar navahrudskich mučanic, jakija achviaravali svaimi žyćciami za miascovych žycharoŭ
U Navahrudku idzie radykalnaja rekanstrukcyja draŭlanaha klaštara nazarecianak, ź jakoha ŭ 1943 hodzie adzinaccać siaścior pajšli na rasstreł, kab uratavać miascovych žycharoŭ. Častka klaštara ŭžo źniesiena, ź inšaj źniali šaloŭku i vokny.
Rekanstrukcyja klaštara nazarecianak. Fota: telehram-kanał «Spadčyna»
Jak paviedamlaje telehram-kanał «Spadčyna», maštabnaja rekanstrukcyja klaštara pa vulicy 1 Maja, 26, pabudavanaha z dreva ŭ 1933 hodzie, nie maje pašparta, tamu dakładna nieviadoma što adbyvajecca z abjektam i chto za hetym staić.
Rabočyja ŭžo demantavali aryhinalnuju draŭlanuju ašaloŭku, staryja vokny i dźviery, raźbirajuć dach i całkam źnieśli zachodniaje kryło budynka.
Klaštar nazarecianak da rekanstrukcyi. Fota: telehram-kanał «Spadčyna»
Rekanstrukcyja klaštara nazarecianak. Fota: telehram-kanał «Spadčyna»
Rekanstrukcyja klaštara nazarecianak. Fota: telehram-kanał «Spadčyna»
Kaštoŭnaść hetaha miesca vymiarajecca pierš za ŭsio nie architekturnymi vartaściami, a suviaźziu z histaryčnymi padziejami. Uletku 1943 hoda Navahrudčyna trapiła pad žorstkuju karnuju apieracyju «Hierman». U noč na 18 lipienia hiestapa aryštavała kala 120 miascovych žycharoŭ i ksiandza Alaksandra Ziankieviča z metaj ich dalejšaha rasstrełu. Maryja Steła (Adela Mardasievič) i jašče dziesiać siaścior-nazarecianak, jakija žyli ŭ klaštary, prapanavali akupacyjnym uładam ułasnyja žyćci ŭ abmien na aryštavanych. Niemcy pahadzilisia: haradžan adpravili na prymusovyja pracy ŭ Rejch, dziakujučy čamu ŭsie jany pieražyli vajnu.
Navahrudskija mučanicy. Fota: Catholic.by
Adzinaccać manašak byli rasstralanyja 1 žniŭnia 1943 hoda ŭ Bataroŭskim lesie. U 2000 hodzie Papa Jan Pavieł II pryličyŭ ich da liku błažennych, a sami nazarecianki stali adnym z hałoŭnych simvałaŭ duchoŭnaha supracivu nacyzmu ŭ Biełarusi.
Aficyjnaha statusu pomnika, niahledziačy na svajo vielizarnaje značeńnie, klaštar nazarecianak dahetul nie maje. Adnak paradoks hetaj radykalnaj rekanstrukcyi ŭ tym, što siońnia budynkam na vulicy 1 Maja vałodaje Kanhrehacyja Siaścior Misijanierak Śviatoj Siamji, jakaja raźmiaściła tam svoj centr.