«Jana była spartyŭnaj dziaŭčynaj». Što viadoma pra zahinułuju pasažyrku deltapłana, jaki ŭpaŭ pad Minskam

Zahinułuju zvali Taćciana, joj było 26 hadoŭ (u vieraśni mahło b spoŭnicca 27). Pra heta žurnalistu vydańnia «Anłajnier» raskazała jaje blizkaja siabroŭka i adnakłaśnica: dziaŭčaty razam vučylisia ŭ škole ahraharadka Hajna ŭ Łahojskim rajonie.

Pa słovach surazmoŭcy «Anłajniera», pra avaryju z deltapłanam jana daviedałasia z navin, ale, pakolki ŭ ich nie zhadvałasia imia zahinułaj pasažyrki, spačatku nie nadała im značeńnia. Tolki siońnia telefon pačaŭ razryvacca ad zvankoŭ byłych adnakłaśnikaŭ: pra trahiedyju kamuści ź ich a 5‑j ranicy paviedamiła siastra Taćciany.

«My litaralna ŭčora ź joj kamunikavali, ale ni pra jaki palot razmovy nie było. Jak jana apynułasia ŭ motadeltapłanie — nieviadoma. Što kankretna tam zdaryłasia — pakul što taksama. Naš ahulny znajomy razmaŭlaŭ z kalehami piłota, jany pamiž saboj nazyvali takuju pryčynu: sarvaŭsia vint i łopaściami hetaha vinta abrezała kryło. Paśla čaho jany pačali padać z vyšyni 50 mietraŭ. Moj znajomy parašutyst, jaki viedaŭ piłota, paćvierdziŭ, što toj byŭ profi, tak što, dumaju, heta i praŭda vypadkovaść, jakaja nijak ad jaho nie zaležała».

Surazmoŭca zhadvaje, što pryčynaj śmierci Taćciany nazvali pierałom pazvanočnika.

Čatyry hady tamu dziaŭčyna skončyła BDEU. U sacsietkach u jaje niamała fatahrafij z roznych spartyŭnych aktyŭnaściaŭ: stretčynh, snoŭbord, basiejn, sapy. Akramia taho, u minułym Taćciana zajmałasia rovarnym turyzmam, mieła miedali i dypłomy ŭ hetaj dyscyplinie.

«Niejkich asabliva ekstremalnych zachapleńniaŭ u jaje nie było, — raskazvaje siabroŭka. — Jana prosta, jak i ŭsie maładyja ludzi, lubiła sprabavać novyja modnyja zabavy, chacieła vostrych adčuvańniaŭ. Tania była spartyŭnaj dziaŭčynaj, davoli aktyŭna zajmałasia stretčynham. Adukacyja ŭ jaje buchhałtarskaja, ale paralelna jana pracavała i tam [u stretčynhu]».

Na momant hibieli Taćciana nie była ni zamužam, ni ŭ adnosinach, dziaciej u jaje taksama nie zastałosia.

Nahadajem, što 14 krasavika pobač z muziejem pad adkrytym niebam u Stročycach pad Minskam adbyłasia katastrofa motadeltapłana. Da viečara z aficyjnych krynic Śledčaha kamiteta stała viadoma, što na borcie znachodzilisia dva čałavieki — abodva pamierli na miescy ad atrymanych traŭmaŭ. Piłatavaŭ latalny aparat 45‑hadovy instruktar Rusłan Ivanoŭ, razam ź im była 26‑hadovaja pasažyrka.

Kamientary da artykuła