Pieršy kitajski tankier, jaki sprabavaŭ prarvać błakadu Armuzskaha praliva, viarnuli nazad

Kitajski tankier Rich Starry, jaki znachodzicca pad amierykanskimi sankcyjami, nie zmoh prajści praz Armuzski praliŭ padčas błakady z boku ZŠA i viarnuŭsia nazad, paviedamlaje ahienctva Reuters.

Tankier Rich Starry. Fota: vesselfinder.com

Raniej sudna sprabavała prajści praz praliŭ i vyjści ŭ Amanski zaliŭ, adnak tam znachodzilisia amierykanskija vajskovyja karabli. U vyniku tankier raźviarnuŭsia i viarnuŭsia ŭ rajon Armuzskaha praliva.

Hetaje sudna raniej užo traplała pad sankcyi ZŠA za pieravozku iranskaj nafty i źmianiała nazvu ŭ minułym. Pavodle danych sistem adsočvańnia ruchu sudnaŭ, jano zahruziła kala 250 tysiač baralaŭ pradukcyi ŭ porcie ŭ Abjadnanych Arabskich Emiratach i ciapier staić na jakary kala bierahoŭ Irana.

ZŠA ŭviali miery błakavańnia ŭ Armuzskim pralivie paśla niaŭdałych pieramoŭ ź Iranam. U rehijonie dziejničaje vialikaja kolkaść amierykanskich vajskovych karabloŭ, a 14 krasavika 8 sudnaŭ byli raźviernutyja nazad u iranskija party.

Iran straciŭ mahčymaść ekspartavać svaju naftu praz praliŭ u pieršyja dni abmiežavańniaŭ. U toj ža čas isnujuć dypłamatyčnyja kantakty pamiž ZŠA, Iranam i pasiarednikami ź inšych krain, jakija sprabujuć adnavić pieramovy.

Kamientary da artykuła