Stała viadoma, jakuju patencyjnuju ździełku abmiarkoŭvajuć ZŠA i Iran
Pavodle krynic vydańnia Axios, ZŠA i Iran abmiarkoŭvajuć patencyjnuju ździełku, u centry jakoj — častkovaja razmarozka iranskich aktyvaŭ ŭzamien na abmiežavańnie jadziernaj prahramy Irana. Pakul pamiž bakami isnuje šmat roznahałośsiaŭ, ale jany mohuć zblizić pazicyi padčas pieramoŭ u pakistanskim Isłamabadzie, zapłanavanych na niadzielu 19 krasavika.
Zdymak ilustracyjny. Fota: AP Photo/Vahid Salemi
Asnoŭnaja ideja zaklučajecca ŭ tym, što Iran moža atrymać dostup da prykładna 20 miljardaŭ dalaraŭ zamarožanych srodkaŭ u abmien na šerah krokaŭ u jadziernaj śfiery. U pryvatnaści, havorka idzie pra vyvaz abo pierapracoŭku iranskaha ŭzbahačanaha ŭranu i ŭviadzieńnie maratoryja na jaho dalejšaje ŭzbahačeńnie.
Pavodle krynic Axios, ZŠA spačatku prapanoŭvali značna mienšuju sumu — kala 6 miljardaŭ dalaraŭ, ale z žorstkimi abmiežavańniami na vykarystańnie hrošaj tolki na humanitarnyja tavary. Iran u adkaz prasiŭ značna bolš — kala 27 miljardaŭ, i ŭ vyniku abmiarkoŭvajecca kampramis kala 20 miljardaŭ.
Asobnym sprečnym pytańniem zastajecca los uzbahačanaha ŭranu (450 kh, uzbahačanaha da 60%). ZŠA patrabujuć jaho poŭnaha vyvazu z krainy, u toj čas jak Iran prapanuje pakinuć jaho ŭ siabie, ale pierapracavać, razbavić abo źmiašać ź inšymi vidami ŭranu.
Taksama razhladajucca kampramisnyja varyjanty, kali častka materyjału zastaniecca ŭ Iranie, a častka budzie pieradadziena treciaj krainie.
Jašče adzin važny punkt — zabarona na ŭzbahačeńnie ŭranu na peŭny termin. ZŠA chočuć, kab heta było kala 20 hadoŭ, a Iran prapanuje značna karaciejšy pieryjad — kala 5 hadoŭ.
Akramia hetaha, abmiarkoŭvajecca, što Iran zmoža zachavać niekatoryja jadziernyja abjekty dla mirnych metaŭ, ale jany pavinny być raźmieščanyja całkam na pavierchni, biez padziemnaj infrastruktury.
Pakul nie zrazumieła, jak u ździełku mohuć być uklučanyja pytańni rakietnaj prahramy Irana i jaho rehijanalnych sajuźnikaŭ.
Paśla źjaŭleńnia hetych paviedamleńniaŭ Donald Tramp zajaviŭ, što nijakich hrošaj Iranu pieradavacca nie budzie, chacia analityki ličać, što biez častkovaj razmarozki aktyvaŭ realnaja damova vyhladaje małavierahodnaj.
Čytajcie taksama:
Łukašenka: Tramp pakazaŭ usiamu śvietu i sapraŭdnaje abličča ZŠA, i abmiežavanaść mahčymaściaŭ ZŠA
Iran na 10 dzion adkryŭ Armuzski praliŭ dla ŭsich sudnaŭ. Ceny na naftu palacieli ŭniz
Kiraŭnik Pientahona pracytavaŭ zamiest Biblii ŭryvak z «Kryminalnaha čytva»
Tramp zajaviŭ, što Iran pahadziŭsia pieradać ZŠA ŭzbahačany ŭran