Biełarusy za 10 hadoŭ abjechali ŭsie rajony krainy. A ciapier jany padzialilisia paradami, pamyłkami i skłali šeść maršrutaŭ dla pačatkoŭcaŭ

Alona pracuje SMM-śpiecyjalistam, a Vova — ajcišnikam. Ale hierojami hetaha tekstu ich zrabiła nie prafiesijnaja dziejnaść, a salidnaje dasiahnieńnie: para pabyvała va ŭsich 118 rajonach krainy. Na vialikaje padarožža pajšło cełych 10 hadoŭ, zatoje vyraz «jość što ŭspomnić» maksimalna padychodzić hetaj historyi. Čamu Jelnia asabliva cudoŭnaja paśla navalnicy, dzie znajści safary ŭ Mahilovie, jak pajezdku mohuć sarvać nasiakomyja i jakija miescy vartyja taho, kab sabracca ŭ padarožža prosta ciapier — jany skłali dla vydańnia «Anłajnier» vialiki pravierany hajd dla ciopłaha siezonu.

Ramantyka ciahnikoŭ, dedłajny i (nia)važnaść navihatara: z čaho ŭsio pačałosia

Historyja padarožžaŭ, raskazvajuć Vova i Alona, pačałasia jašče ŭ 2015 hodzie. Tady abodva pierajechali ŭ stalicu z Marjinaj Horki. Varyjant prosta zhaniać dadomu na kožnyja vychadnyja chutka nadakučyŭ, tamu i źjaviłasia dumka vyvučyć krainu.

Maładziečna, 2024 hod

U toj momant usio ŭpirałasia ŭ finansavyja mahčymaści — bo jany byli zvyčajnymi studentami. Tamu vyrašyli padarožničać ź floram ramantyki: načnyja pierajezdy na ciahnikach ź Minska ŭ abłasnyja harady, dzień tam, a śledam — daroha dadomu.

«U asnoŭnym my padarožničali ŭdvoch, ale časam dałučalisia našy siabry. Jak, u pryncypie, byvaje i ciapier. Ale naš pastajanny skład — heta dva čałavieki», — raskazvaje Vova.

Krasnasielskija krejdavyja karjery, 2025 hod

Praŭda, u toj momant ambicyjnaj mety — naviedać usie rajony krainy — jašče nie było. Dy i sami pajezdki vydavalisia nie vielmi časta — niekalki razoŭ u ciopły siezon.

Nabirać temp para pačała paśla źjaŭleńnia mašyny. Ale surjozna ŭsio zakruciłasia praz skretč-kartu. Pa sutnaści, heta zvyčajnaja hieahrafičnaja karta, tolki pakrytaja śpiecyjalnaj plonkaj — pa ŭmovie treba zacirać učastki, kudy padarožnik zmoh dabracca. Kankretna ŭ toj, što akazałasia ŭ pary, metaj było adznačeńnie ŭ kožnym sa 118 rajonaŭ Biełarusi.

Kryčaŭskija krejdavyja karjery, 2023 hod

«My padumali: a čamu b nie pastavić sabie takuju metu — biez dedłajnaŭ? Choć potym usio ž vyrašyli ŭstanavić terminy i padcisnuć, kab usio zakryć chutka i pryhoža. Šeryja plamy pačali razdražniać», — śmiajecca Alona.

Usio heta zdaryłasia ŭžo ŭ 2019 hodzie. Mienavita z hetaha momantu padarožžy pieraaryjentavalisia z pajezdak pa słavutaściach na naviedvańnie rajonaŭ. Dla sumlennaści miescy, jakija para paśpieła naviedać da čelendžu, «ścierlisia» zahadzia. Naprykład, heta šmatlikija łakacyi ŭ Minskaj vobłaści i abłasnych centrach. I ŭsio ž pajeździć dla dasiahnieńnia mety treba było prystojna.

Sałtany, 2020 hod

«Dumaju, što ŭ Instagram rezka pačali raskazvać pra padarožžy pa krainie paśla zakryćcia miežaŭ. Šmat chto, darečy, na hetym z nula vyraściŭ błohi. Ale kali my pačynali, usiaho hetaha jašče nie było. U nas dahetul časta pytajucca, dzie my znajšli stolki cikavych miescaŭ — pašancavała vypadkova znajści vielmi kruty stareńki sajt «Hłobus.baj». Tam raźmieščana vialikaja karta Biełarusi sa słavutaściami i ich rejtynham ad 1 da 4 z punktu hledžańnia architekturnaj spadčyny. U nas, darečy, praktyčna zakrytyja ŭsie adzinački i dvoječki — heta vyšejšyja adznaki».

Rasony, 2025 hod

Na starcie ŭsie maršruty składaŭ Vova — u chod išli i karty, i padkazki «Huhła» i taho samaha sajta. Navihatara ŭ toj čas u pary jašče nie było, tamu karta razdrukoŭvałasia na pryntary, a časam patrebnyja miescy paznačalisia ŭručnuju.

«Ja ž bolš była natchnialnikam: prapanoŭvała roznyja varyjanty, kudy pajechać, što dakinuć, i prasiła Vovu sabrać usio ŭ adziny maršrut. Chaciełasia zrabić tak, kab za adnu pajezdku nam udavałasia pahladzieć maksimalna šmat», — raskazvaje Alena.

Nalibockaja pušča, 2023 hod

Kamary, ruiny i rasčaravańni: da čaho varta padrychtavacca pačatkoŭcam

Na starcie, ščyra pryznajucca hieroi, jechać na dalokija adlehłaści im było lanota. Tamu śpiarša ŭdałosia zakryć usie rajony Minskaj vobłaści. Ale raz užo meta była pastaŭlenaja, pastupova maršruty stanavilisia ŭsio bolš addalenymi.

Vioska Vialikija Tupały, 2024 hod

«Vielmi doŭha niepaznanym dla nas zastavaŭsia poŭdzień, my zakryvali jaho apošnija dva hady. Kali na starcie pajezdki zdaralisia niekalki razoŭ za siezon, to pad kaniec my mahli jeździć kožnyja vychadnyja — navučylisia padładžvacca pad nadvorje», — raskazvaje Alena.

«Što cikava: nie było dzion, kali b na terytoryi ŭsioj krainy było drennaje nadvorje. Zaŭsiody znachodziłasia «ciomnaja plamka» na našaj karcie, dzie ŭ hety dzień nie było daždžu, — tudy my i adpraŭlalisia».

Pinsk, 2023 hod

Što tyčycca samich łakacyj, to asabliva Vovu i Alenie padabajucca zakinutyja miescy, ruiny i razvaliny. Tamu na sabie adčuć efiekt «čakańnie — realnaść» z-za ŭbačanaha nie daviałosia za ŭsie 10 hadoŭ pajezdak.

Rasna, 2024 hod

«Ale byli paru miescaŭ, kali ty pryjazdžaješ, a tam naohuł ničoha niama! Ci mahło być tak: kab znajści reštki, jakija ty bačyŭ na fatahrafii, treba leźci ŭ niejkija kusty. Hladziš, prykidvaješ i razumieješ: nu, i ładna. Uličvajučy, što naš maršrut moh składacca z 10—15—20 punktaŭ, rasčaravacca, što jaki-niebudź adzin vylecieŭ, nie davodziłasia. Prosta jechali dalej», — tłumačyć łohiku Vova.

I ŭsio ž u niejkija miescy dajechać tak i nie atrymlivałasia. Naprykład, tak zdarałasia, kali maršrut pralahaŭ pa vielmi drennaj darozie. Časam navat davodziłasia vybirać: kidać mašynu i iści pieššu albo ž raźviarnucca nazad. Rašeńnie zaležała ad dvuch faktaraŭ: adlehłaści, jakuju treba było prajści na svaich dvaich, i žadańnia ŭbačyć kankretnaje miesca.

Narutavičy, 2025 hod

«Naprykład, kala Chojnikaŭ — u Rudakovie — znachodzicca siadziba, jakuju my vielmi chacieli pahladzieć. Ale kamary nastolki sapsavali vajb hetaha miesca! Navat spynicca było nierealna, tak što my zrabili paru fatahrafij i ŭciakli».

Samy čas abmierkavać łajfchaki. Pačynajem sa zboraŭ — tut usio akazvajecca maksimalna prosta. Vova z uśmieškaj tłumačyć: dabracca praktyčna ŭ luboje miesca našaj krainy možna choć u tapačkach.

Dzisna, 2025 hod

«Viadoma, varta prychapić z saboj parasony. Ale samaje važnaje — pierakus. My nie raśpieščanyja padarožniki, jakija čakajuć parkoŭki, tualetaŭ i kaviarniaŭ, tak što ježa z saboj — abaviazkova. Jašče niadrenna było b mieć kamplekt źmiennaha adzieńnia».

«Niejak na Isłačy my vyrašyli pierajści ŭsiu raku pa cudoŭnym tonkim biervianie. Spačatku ŭpaŭ ja, ale ŭsiaho tolki zamačyŭ adnu nahu, a potym Alona — pahruziłasia ŭžo pa vušy! My pryniali drennaje rašeńnie vysušyć usio na vohniščy, a jano čamuści nie sochła. Tak što troški pahulali i pajechali dadomu».

Kadr z toj samaj pajezdki na Isłač, 2021 hod

Darečy, pra viartańnie. Alona i Vova raskazvajuć, što ŭ asnoŭnym maršruty raźličvali ŭ farmacie padarožža adnaho dnia. Inšaje pytańnie, što spačatku ŭdavałasia naviedać maksimum adnu łakacyju, a voś paźniej piśmiennaje płanavańnie zrabiła kožnuju pajezdku bolš efiektyŭnaj. Naprykład, zadumvaješ pryjechać u punkt A, pa darozie zajazdžaješ u punkt B, a pierakusić i vypić harbaty z termasa možna ŭ punkcie V — i voś za dzień atrymlivajecca ŭbačyć užo try łakacyi.

«Z asabistaha vopytu: raju ŭsio ž drabnić maršruty daŭžej za 500 kiłamietraŭ. Asabliva heta aktualna dla tych, chto tolki pačynaje padarožničać. Inakš moža pačacca honka», — pieraścierahaje Vova.

Raka Słuč, 2025 hod

Siezonnaść, mast-vizit i miescy, kudy časta nie dabirajucca turysty

Kali lepš płanavać pajezdki? Sa svajho vopytu para raić vybirać ciopły siezon — prykładna z sakavika-krasavika pa kastryčnik. Jašče adzin momant, jaki varta ŭličvać, — nasiakomyja. Tak u Alony z Vovaj było z pajezdkaj u Nalibockuju pušču — vajb ad 40‑kiłamietrovaj prahułki pieššu sapsavała našeście alenievaj kryvasmočki. Nie budziem zahłyblacca, ale naŭrad ci pryjemna vyciahvać latajučuju «drobiaź» z vałasoŭ i navat kišeniaŭ.

Nalibockaja pušča, 2022 hod

«A voś zimoj my adpačyvajem i pilim fotački. Bo i kantentu šmat — treba prydumlać, što ź im rabić».

Za kantent pa-raniejšamu adkazvaje Alena. Dziaŭčyna raskazvaje, što mety raźvivać tematyčny błoh u ich niama. Akaŭnt u tym ža Instagram para chutčej viadzie ŭ farmacie siamiejnaha alboma. Pad nastroj mohuć być krychu bolš padrabiaznyja apisańni kankretnych łakacyj, ale čaściej pakazanyja data i kaardynaty.

Niejak Alona i Vova sprabavali vieści błoh na YouTube. Ale patracić čas śpiarša na zdymku, a zatym na mantaž i ŭ vyniku atrymać usiaho niekalki prahladaŭ — miakka kažučy, tak sabie historyja dla matyvacyi.

«Tak, my sprabavali zaleźci va ŭsio heta błohierstva. Ale vyrašyli, što my ŭsio ž bolš pra zadavalnieńnie. Nam padabajecca jeździć i być u niejkich miescach, čym pra ich raskazvać».

Park Repichava, Lachavicki rajon, 2023 hod

Darečy, navat za 10 hadoŭ Vova i Alona nie zmahli naviedać absalutna ŭsie łakacyi, jakija chaciełasia b. Naprykład, byvała, pryjazdžali, a słavutaści začynieny na restaŭracyju. Zatoje, zapeŭnivaje para, jość padstava viarnucca.

«Naprykład, tak było z pałacam u Žyličach. Pieršy raz pryjechali i pahladzieli — nu tak, cikava. Ale kali viarnulisia i ŭbačyli siadzibu ŭžo z ekspazicyjaj — było značna lepš».

Žyličy, 2024 hod

«A voś na karjer u Mikaševičach my nie dabralisia dahetul! Reč u tym, što tudy viadziecca zapis u peŭny dzień i hadziny, pryčym mienavita dla ekskursijnych hrup składam nie mienš za piać čałaviek. My sabralisia ŭ minułym hodzie ź siabrami, ale ŭ vyniku nie pajechali — pa prahnozie nadvorja pieradavali zalevy. Słovam, źbirajemsia nie pieršy hod — i ŭsio nijak. Bo heta niešta nakštałt Hrand Kańjona — tam pabyvali ŭsie topavyja trevieł-błohiery Biełarusi».

Jašče z takich miescaŭ — vostraŭ Du, jon ža samy vialiki ŭ Biełarusi. Znachodzicca ŭ Viciebskaj vobłaści, a dabracca tudy možna tolki na łodcy. 

Darečy, sa svajho vopytu Vova i Alona zaŭvažyli: mienavita krajnija rajony — poŭnač i poŭdzień krainy — časta zastajucca niedaacenienymi turystami. Naprykład, u Viciebskuju vobłaść varta adpravicca fanatam pryrody i spłavaŭ na bajdarkach. Praŭda, paŭstaje pytańnie z transpartam — hramadski nie zaŭsiody viadzie ŭ patrebnaje miesca.

Brasłaŭskija aziory, 2022 hod (fota z ahladnaj placoŭki)

«Viadoma, kali razhladać kartu pomnikaŭ architektury, to bačna: na zachadzie ich bolš. I heta sapraŭdy tak. Naprykład, u minułym hodzie my zajazdžali ŭ krajnija punkty na ŭschodzie — jechać doŭha, ale epičnych ruin ci zamkaŭ tam praktyčna niama, a tyja łakacyi, što jość, raskidanyja adzin ad adnaho.

U toj ža čas na poŭdni jość maleńkija harady nakštałt Turava, dzie niama mnostva zabaŭ, ale sam horad i archieałahičny muziej — prosta supier!»

Archieałahičny muziej u Turavie, 2023 hod

«Jašče ŭ 2023 hodzie my pabyvali ŭ Pinsku, ale praviali tam vielmi mała času — usiaho 4 hadziny. Tak što dakładna varta tudy viarnucca i zatrymacca daŭžej».

Pinsk, 2023 hod

Ciapier — tema mast-vizit dla kožnaha biełarusa. Śpis u Aleny i Vovy atrymlivajecca prykładna takim: usie abłasnyja centry, Mirski i Niaśvižski zamki, Pinsk, Mazyr, Połack, Mścisłaŭ i Jelnia. Abodva akcentujuć: pa častcy apošniaha punkta jość važnaje ŭmova.

Jelnia, 2017 hod

Jelnia, 2017 hod

Jelnia, 2017 hod

«My ŭpieršyniu pabyvali tam paśla navalnicy — i Jelnia bolš nie była takoj pryhožaj, jak u toj dzień. Ujavicie: farby zachadu sonca, viasiołka, vielmi ciomnaje nieba, jarkaja trava, dychajecca asabliva čysta, uzrovień vady jak treba. Heta nievierahodna!»

Idealny horad dla prapanovy, firmovyja fota z pacałunkam i safary

Uličvajučy salidny bekhraŭnd, Alona i Vova pryznajucca: kudy kamfortniej im spyniacca mienavita ŭ nievialikich miastečkach. Bo i padarožžy kaliści stali mahčymaściu vynyrnuć z pracoŭnaj ruciny i šumnaha rytmu vialikaha horada.

Paryž, 2022 hod

Ale jość i vyklučeńnie — Mahiloŭ. Mienavita siudy padarožniki viartajucca čaściej za ŭsio, a pryčyn adrazu dźvie: praktyčnaja i ramantyčnaja.

«Pa-pieršaje, heta samy blizki ad Minska abłasny centr, tak ci inakš tudy zručna zajechać padčas padarožžaŭ pa vobłaści. Pa-druhoje — tut ja zrabiŭ Alonie prapanovu. Naohuł, spačatku dumaŭ pra krejdavyja karjery, ale tudy my na toj momant tak i nie zmahli dajechać. A čakać nie chaciełasia», — uśmichajecca Vova.

Mahiloŭ, 2016 hod

«Mahiloŭ — vielmi pryhožy horad. Darečy, mahčyma, taksama krychu niedaacenieny. Tam jość kłasny zaasad i safary — šmat zubroŭ, možna pakarmić rybu i prakacicca ŭ ekspres-paravoziku. Nievierahodnaje miesca!»

Darečy, tam ža zaradziłasia simvaličnaja tradycyja pary — rabić kala słavutaści firmovaje fota z pacałunkam. 

Lida, 2025 hod

Łojeŭ, 2025 hod

Vialiki Dvor, 2022 hod

Mir, 2024 hod

Staryja Piaski, 2025 hod

Skoki, 2025 hod

Krasnasielskija krejdavyja karjery, 2017 hod

Što dalej? Spyniacca ŭ padarožžach Vova i Alona dakładna nie płanujuć, tamu zaraz šukajuć novy farmat. Tym bolš što niadaŭna ŭ pary źjaviŭsia sabaka, pudziel pa mianušcy Štrudziel — jość dumki prydumać niešta ŭ hetym kirunku.

«Jašče ŭ nas jość vialikaja mara — vydać fotaknihu pra našy padarožžy pa Biełarusi. Ujavicie, što tolki ŭ sacsietkach apublikavanych fatahrafij kala 12 tysiač! Ale jakija ž heta buduć pakuty vybaru, bo zachočacca pakazać zanadta mnohaje».

Sarja, 2024 hod

— Kali chtości zadasca pytańniem: a navošta vam usio heta było patrebna? Možna było b prosta spakojna jeździć, nie stavić pierad saboj kankretnyja mety i terminy. 

— Nam padabajecca cikava pravodzić čas. Chodziš u škołu ci ŭniviersitet, dumaješ, što viedaješ usio pra našyja miescy. A tut jedzieš i razumieješ: kłasna! Chočacca, kab biełarusy čaściej jeździli pa krainie i daviedvalisia pra jaje — jano dakładna taho vartaje. 

Padarožničajem pa Biełarusi: 6 niezvyčajnych maršrutaŭ ad hierojaŭ artykuła

Pierad intervju žurnalisty paprasili Vovu i Alonu skłaści niekalki maršrutaŭ dla tych, chto hatovy sarvacca ŭ padarožža. Zapyt byŭ prykładna takim: niezajezdžanyja miescy, dzie dakładna budzie cikava.

Proźvišča Alony i Vovy — Radziuk. Zaŭvažyli adsyłku?

«Jak my budavali i našy maršruty: hruntujučysia na adnym miescy, u jakoje chočacca pajechać, hladzim cikavaje vakoł — tak šlach možna zakalcavać. Taksama my ŭličyli varyjatyŭnaść, kab možna było pajechać u lubuju vobłaść i va ŭsie baki. Darečy, kožny maršrut možna padzialić na kavałački». 

Maršrut №1. Lepiel — Połymia — Smalany — Orša — Škłoŭ — Kniažycy — Bahuševičy

Lepiel. Heta miesca prosta skaryła našy sercy — voziera z burnymi chvalami, pryhožy cmok i kaścioł, niby ź filma!

Połymia. Łakacyja — ahoń! Asabliva dla tych, chto lubić atmaśfiernyja ruiny, pobač jość i inšyja pabudovy, jakija raniej adnosilisia da siadziby

Smalany. Kolkaść cikavostak na kvadratny kiłamietr prosta zaškalvaje! Atmaśfiernyja ruiny kaściołaŭ i cerkvaŭ, a taksama frahmient viežy byłoha zamka «Bieły Koviel», jaki nievierahodna ŭražvaje! U Smalanach my byli dvojčy, i heta adno z našych lubimych miescaŭ u Biełarusi

Orša. Ažyŭleny horad z bahataj historyjaj. Pry najaŭnaści času lepš zatrymacca i prahulacca pa parku, pahladzieć na tryumfalnuju arku i vypić chlebnaha kvasu z łarka-bočki

Škłoŭ. Tut, mabyć, samaja pryhožaja ratuša ŭ Biełarusi. A jašče pomnik ahurku — voś jak minimum dźvie pryčyny naviedać hety horad

Bahuševičy. Kazačny kaścioł, jaki budaražyć ujaŭleńnie

Maršrut №2. Budsłaŭ — Mosar — Paryž — Łučaj — Pastavy — Vilejka — Krasnaje

Budsłaŭ. Znakamity kaścioł u Budsłavie my naviedali ŭ 2022 hodzie. I choć jon, biezumoŭna cudoŭny i vieličny, a voś pryhožaj terytoryi z raślinami, skulpturami pobač, na žal, niama. Adnak unutry nam udałosia praniknucca tak, što zachoplivała duch! Asabliva ad pieśni ŭ styli rusałak čornaha voziera z Hary Potera (milenijały, pryvitańnie!). Ślady pažaru dzie-nidzie zachavalisia, ale ŭ cełym kaścioł biernardzincaŭ vyhladaje vydatna

Mosar. Hetaja łakacyja — naša ŭjaŭleńnie pra Italiju. Pryhoža, atmaśfierna. Akramia kaścioła vielmi pryhožaja terytoryja: vielizarnyja ałoe, roŭna padstryžanyja kusty, kvietki, vadajomy i skulptury, krynica na ŭzhorku, ź viaršyni jakoha nam adkryŭsia cudoŭny vid. Uvohule idealnaje miesca dla prahułak i pryhožych fotačak u Instahram

Łučaj. Vielmi pryhožy chram, jaki ŭklučany ŭ Dziaržaŭny śpis historyka-kulturnych kaštoŭnaściaŭ. Na žal, raskošnaje ŭbrańnie ŭnutry my nie zmahli ŭbačyć, zatoje ŭvolu nahulalisia pa pryhožaj terytoryi, dzie było šmat raślin i skulptur 

Pastavy. Nievialiki haradok, jaki pry žadańni možna abyści za paru hadzin, ale cikavaha tut šmat! Ad kaścioła na bierazie raki, da šarahovaj zabudovy ź miłymi piernikavymi domikami i nadzvyčajnym fantanam

Vilejka. Horad, jaki nahadaŭ nam pra pajezdku ŭ Polšču. Pryhožaja płošča z kaściołam i carkvoj, skiejt-park i dendrapark ź vidam na Viliju

Krasnaje. Vyrašyli dadać bonusnym punktam. Pa darozie možna zajechać i ŭ Maładziečna, kali nie byli. Kaścioł u Krasnym dakładna nie prapuścicie — jaho budzie bačna z darohi

Maršrut №3. Juravičy — Mazyr — Naroŭla — Turaŭ

Juravičy. Doŭha paźbiahali hetaha miesca z-za jaho addalenaści, a darma — pryhožy chram i stajanka pieršabytnaha čałavieka vartyja naviedvańnia

Mazyr. Zakachalisia ŭ hety horad jašče ŭ 2020 hodzie. Viarnulisia praz 4 hady, kab daśledavać jaho jašče bolš. Tut vas čakaje chajkinh pa-biełarusku: uzhorysty reljef i leśvicy roznych kalibraŭ. A jašče nadzvyčajnaja mahutnaja Prypiać, stareńkija tramvai (idealna dla fanataŭ hetaha vidu transpartu), staražytnyja jary i mnohaje inšaje 

Naroŭla. Horad zapomniŭsia dobrymi ludźmi ŭ muziei, smačnymi ziefirkami, a jašče vieličnymi ruinami (nam kazali, što budzie maštabnaja rekanstrukcyja) i pryhožaj nabiarežnaj

Turaŭ. Bonusny punkt, jaki možna pakinuć i na nastupny raz, ale kali navažyciesia — nie paškadujecie. Historyka-archieałahičny kompleks «Staražytny Turaŭ» nazaŭsiody ŭ našym sercajku. A jašče možna ŭbačyć płyvučy hatel «Paleśsie» na bierazie Prypiaci, pajeści ŭ kaviarni Bonfesto, a zaadno kupić šmat roznych smačnych syroŭ u kramie pobač

Maršrut №4. Skidziel — Śviack — Aŭhustoŭski kanał

Bali. Prykolny bonus, čamu b nie pačać padarožža z takoha svavolstva? Tym bolš što pa darozie:) 

Skidziel. Samy maleńki i mileńki kaścioł, jaki my bačyli

Śviack. Pahladzieć pałacava-parkavy ansambl Vałovičaŭ u 2021‑m nam nie ŭdałosia, tamu što išli raboty pa restaŭracyi. Ale atrymałasia prahulacca ŭzdoŭž kanała i zrabić paru kadraŭ — teleabjektyŭ znoŭ spatrebiŭsia i spracavaŭ na ŭra

Dambroŭka. Nam zdajecca, što siudy pavinien dajechać kožny. Tut znachodzicca Aŭhustoŭski kanał — hrandyjozny i maštabny prajekt XIX stahodździa — u śviecie isnujuć tolki try padobnyja kanały! Vielmi rekamiendujem patrapić na šluzavańnie sudna. Nazirać za hetym vielmi cikava!

Maršrut №5. Miory — Vierchniadźvinsk — Sarja — Aśvieja

Miory. Miastečka z pryhožaj nabiarežnaj i kaściołam z čyrvonaj cehły

Uźmiony. Bonusny punkt, praź jaki ŭsio adno budziecie prajazdžać. Možna spynicca, kab pryparkavacca na viertalotnaj placoŭcy i pahladzieć na samy vysoki most u Biełarusi

Vierchniadźvinsk. My vielmi lubim nabiarežnyja — tut adna z samych pryhožych. Pa samim horadzie taksama cikava prahulacca i zirnuć na miascovyja słavutaści

Sarja. Chram u Sarji adzin z samych jarkich pradstaŭnikoŭ stylu nieahotyki (lubimy styl Alony), nu i most, i nie prosty, a padviesny. Taksama asobnaj uvahi zasłuhoŭvaje i raka Sarjanka, u jakuju my zakachalisia ź pieršaha pohladu, dy tak mocna, što viarnulisia praź niekalki miesiacaŭ na spłaŭ na bajdarkach 

Aśvieja. Tut — atmaśfiernyja ruiny i vostraŭ Du. A jašče vajbavaja krama vierchniadźvinskich syroŭ

Maršrut №6. Flerjanova — Hrušaŭka — Saviejki — Miadźviedzičy — Jastrambiel — Paŭlinava

Flerjanova. Ubačyŭšy adnojčy — zapomnicie nazaŭždy. Śpieradu fasad ź viežami z čyrvonaj cehły, a za im chavajecca zvyčajny draŭlany dom, praŭda dastatkova vialiki i dvuchpaviarchovy. Kali vieryć tabličcy na dźviarach, to ŭ budynku jość muziej 

Hrušaŭka. Miesca ŭ duchu fentezi! Pachavalniu i siadzibu Rejtanaŭ naviedvali ŭ 2021‑m hodzie, tady bačyli, što siadziba aktyŭna restaŭrujecca. Zaraz tam značna pryhažej i my ŭžo sami płanujem paŭtaryć vizit u heta miesca 

Saviejki. Atmaśfiernaja siadziba, jakuju pahłynaje pryroda! Niezabyŭnaje miesca, a akramia siadziby tut možna znajści i inšyja pabudovy

Miadźviedzičy. Pryhožy kaścioł, z kubkami ahniu

Jastrambiel. Jašče adna čaroŭnaja siadziba, jakaja ŭvachodzić u naš asabisty top

Paŭlinava. Heta siadziba chavajecca ŭ parku viekavych dreŭ, niejkija ź ich vysachli, inšyja ž svajoj listotaj chavajuć nieba. U naš vizit u 2021‑m jana była z adnaho boku pafarbavanaja i navat z novymi voknami

P.S. Kali pa niejkich maršrutach zastanucca pytańni, Vova i Alena hatovyja raskazać padrabiaźniej u Instagram. A jašče tam ža možna znajści sotni fota ź inšych cikavych miescaŭ, dakładnyja łakacyi i šmat natchnieńnia.

Kamientary da artykuła