Eks-hulec zbornaj Biełarusi pra pieršuju žančynu-treniera ŭ Hiermanii: Jak jana budzie zachodzić u mužčynskuju raspranalniu? Pastajanna hrukacca?
Były forvard zbornaj Biełarusi Viačasłaŭ Hleb prakamientavaŭ pryznačeńnie Mary-Łuizy Ety na pasadu hałoŭnaha treniera bierlinskaha «Unijona», piša football.by.
Mary-Łuiza Eta. Fota: sacsietki kłuba
— Navina pra pryznačeńnie Mary-Łuizy Ety va «Unijon» mianie ździviła. Adnak jany lubiać epatavać, heta ž Jeŭropa! Tam chapaje fieministak, jany vystupajuć za roŭnaść i inšyja rečy, jakija ja nie chaču ahučvać. Ale mnie zdajecca, što heta niapravilny šlach. Nie chaču skazać, što žančyny pavinny być dalikatnymi. Chočuć być mocnymi — niachaj. Ale hladzicie: jak žančyna budzie zachodzić u mužčynskuju raspranalniu? Pastajanna hrukacca? A jak chłopcy buduć jaje ŭsprymać? Jak ekśpierymient heta cikava, ale, na moj pohlad, jon nie atrymajecca.
— Dumajecie, u biełaruskim futbole takoje niemahčyma?
— U teoryi ŭsio mahčyma. Ja vučyŭsia na trenierskich kursach razam ź dziaŭčynaj. Ale možna parazvažać i ź inšaha boku: chto ŭ našym žanočym čempijanacie ŭznačalvaje žanočyja kamandy? Mužčyny. Ale atrymlivajecca, što ŭsio mahčyma. I «Unijon» heta dakazaŭ. Ci pryniasie heta pośpiech? Sumniavajusia.
Mary-Łuizu Etu pryznačyli v.a. hałoŭnaha treniera bierlinskaha kłuba na minułym tydni paśla zvalnieńnia Štefana Baŭmharta.
Heta pieršy vypadak pryznačeńnia žančyny na pasadu hałoŭnaha treniera ŭ čempijanatach top-piaci jeŭrapiejskich futbolnych krain (Anhlija, Hiermanija, Ispanija, Italija i Francyja).
Mary-Łuiza treniravała junackuju kamandu U19 i pavinna była ŭznačalić žanočuju kamandu ź leta.
Eta — paśpiachovaja futbalistka: jana hulała ŭ apornaj zonie, u pryvatnaści za «Turbine Patsdam», stanaviłasia čempijonkaj Hiermanii i vyjhravała Lihu čempijonaŭ. Jaje klikali va ŭsie moładzievyja zbornyja ad U15 da U23. U «Unijonie» jana ŭžo pracavała pamočnikam treniera ŭ 2023 hodzie.
Siońnia «Unijon» zhulaje ŭ matčy čempijanatu Hiermanii z «Volfsburham».
Bierlinski kłub za piać turaŭ da finišu zajmaje 11‑y radok u Bundeślizie, na 11 bałaŭ znachodziačysia vyšej za zonu vyletu, dzie atabarylisia zhadany «Volfsburh» i «Chajdenchajm» i na 6 bałaŭ vyšej za «Sankt-Paŭli», što zajmaje 16‑y radok. Kamanda, što finišuje 16-j, budzie hulać u stykavych matčach z kłubam, što finišuje trecim u druhoj bundeślizie.
Viačasłaŭ Hleb, małodšy brat Alaksandra Hleba, u svoj čas zhulaŭ 10 matčaŭ za «Hamburh» u Bundeślizie, vystupaŭ za «Frankfurt», šviejcarski «Hraschopier», ale nidzie nie zdoleŭ stać hulcom asnovy. Potym hulaŭ u Kitai.
U čempijanacie Biełarusi pahulaŭ za niekalki biełaruskich kłubaŭ. Apošnim kłubam Hleba-małodšaha staŭ dziaržynski «Arsienał». U krasaviku hetaha hoda jon uznačaliŭ GGS United z druhoj lihi.