Meta źbirajecca praz štučny intelekt zvolnić 8 tysiač rabotnikaŭ

Pavodle infarmacyi ahienctva Reuters, kampanija Meta płanuje pravieści maštabnyja skaračeńni supracoŭnikaŭ, źviazanyja z aktyŭnym ukaranieńniem štučnaha intelektu.

Fota: Pavlo Gonchar / SOPA Images / LightRocket via Getty Images

Pieršy etap zvalnieńniaŭ pryznačany na 20 maja. Miarkujecca, što na hetym etapie mohuć skaracić kala 10% štatu kampanii — heta prykładna 8 tysiač čałaviek. U druhoj pałovie hoda mahčymyja novyja chvali zvalnieńniaŭ, ale kančatkovyja płany jašče nie vyznačanyja i mohuć źmianiacca ŭ zaležnaści ad raźvićcia ŠI-technałohij.

Pryčyna takich mier — imknieńnie pavysić efiektyŭnaść pracy. Kiraŭnictva kampanii choča skaracić kolkaść kiraŭničych uzroŭniaŭ i zrabić staŭku na supracoŭnikaŭ, jakija vykarystoŭvajuć u svajoj pracy štučny intelekt.

Apošnim časam Meta ŭžo praviała rearhanizacyju: častku inžynieraŭ pieraviali ŭ novaje padraździaleńnie, źviazanaje z prykładnym ŠI, dzie raspracoŭvajucca sistemy, zdolnyja pisać kod i vykonvać składanyja zadačy. Inšych supracoŭnikaŭ pieranakiroŭvajuć u novyja biznes-kirunki.

Heta nie pieršyja značnyja skaračeńni ŭ kampanii. Raniej Meta ŭžo zvalniała tysiačy supracoŭnikaŭ u ramkach aptymizacyi biznesu.

Akramia taho, kampanija aktyŭna inviestuje ŭ raźvićcio štučnaha intelektu. Naprykład, u 2025 hodzie jana ŭkłała kala 15 miljardaŭ dalaraŭ u startap Scale AI, kab uzmacnić svaje pazicyi ŭ kankurencyi ź inšymi technałahičnymi hihantami.

Kamientary da artykuła