USU nanieśli ŭdar pa vajskovym zavodzie ŭ Tahanrohu

Ukrainskija rakiety pacelili ŭ zavod «Atłant Aera» ŭ rasijskim Tahanrohu, dzie vyrablajuć udarna-raźviedvalnyja drony «Małanka» i kampanienty dla dronaŭ «Aryjon». 

Hubiernatar Rastoŭskaj vobłaści Juryj Ślusar paviedamiŭ, što paśla načnoha rakietnaha ŭdaru USU pa Tahanrohu pačaŭsia pažar na terytoryi składskich pamiaškańniaŭ, paciarpieła kamiercyjnaja infrastruktura.

Jon udakładniŭ, što try čałavieki źviarnulisia pa miedycynskuju dapamohu. Na miescy pracujuć ekstrannyja słužby, danyja pra razbureńni ŭdakładniajucca.

Taksama ŭnočy 19 krasavika ŭkrainskija BPŁA atakavali port u Jejsku Krasnadarskaha kraju. Miascovyja ŭłady śćviardžajuć, što abłomki dronaŭ upali, ale ŭzharańniaŭ niama, adnak na fota i videa vidać, što nad terytoryjaj porta padymajecca dym.

Jejski marski port — univiersalny port na Azoŭskim mory. Praź jaho štohod prachodzić ad 3 da 4,5 młn ton hruzaŭ, pieravažna zbožža, vuhal, naftapradukty, a taksama mietały i naliŭnyja hruzy. Praź nievialikuju hłybiniu Azoŭskaha mora port prymaje sudny abmiežavanaha tanažu. Jon adyhryvaje važnuju rolu ŭ łahistycy Azova-Čarnamorskaha basiejna. Taksama hruzy ź Jejskaha marskoha porta dastaŭlajucca ŭ krainy Mižziemnaha mora, naprykład, u Jehipiet.

U rasijskim Minabarony paviedamili, što za noč siły SPA źbili nad rehijonami Rasii 13 bieśpiłotnikaŭ.

Kamientary da artykuła