Źjavilisia viersii, čamu mahli zatrymać katalickaha śviatara z-pad Vilejki
Na fonie adsutnaści jakoj-niebudź aficyjnaj infarmacyi ŭ kole katalickich viernikaŭ Biełarusi źjaviłasia viersija adnosna taho, što stała vierahodnaj padstavaj dla aryštu śviatara Anatola Parachnieviča ŭ Vilejskim rajonie, piša Katolik.life.
Anatol Parachnievič
Supastaviŭšy niekatoryja fakty, pra jakija daviedalisia vierniki, jany zrabili vysnovu, što ksiandza Anatola Parachnieviča mahli abvinavacić u dapamozie ŭ spravie zachavańnia pamiaci hramadzian Polščy, jakija zahinuli ŭ raniejšyja hady na terytoryi sučasnaj Biełarusi.
Pra što kankretna idzie havorka — vierniki pakul kazać nie mohuć, kab hetyja źviestki, mahčyma, nie byli vykarystanyja suprać śviatara i jaho dobrych spraŭ.
Taksama viernikam viadoma, što ksiondz Anatol Parachnievič adkryta vystupaŭ suprać napadu Rasii na Ukrainu, asudžaŭ vajnu, zaklikaŭ da miru i pakajańnia. Na adnoj sa staronak zachavalisia jaho słovy z hetaj nahody, prymierkavanyja da pačatku Vialikaha postu ŭ 2022 hodzie, Popielnaj sierady, jakaja prypadała na pieršyja dni vajny:
«Pasypajem popiełam hałovy, prosiačy ŭ Boha prabačeńnia… Boh miłaserny, Jon prabačyć… A ci prabačyć nam naša ŭłasnaje sumleńnie?»
Ksiondz Anatol Parachnievič — ź dziacinstva sirata. Jon naradziŭsia ŭ vioscy ŭ Žłobinskim rajonie, vychoŭvaŭsia ŭ dziciačym domie. Pakolki ŭ jaho niama rodnych i blizkich, to daviedacca pra jaho situacyju vielmi składana.
Čytajcie taksama:
Katalicki śviatar ź Vilejščyny sustreŭ Vialikdzień za kratami. Što pra jaho viadoma?
Zatrymany dva jevanhielskija praśvitary i ksiondz Anatol Parachnievič