«Žudaść žudasnaja». U rasijskim hateli prosta kala łožka pastavili pomnik sałdatu Alošu
Pabiedabiesny kreatyŭ u adnoj z haścinic Vołahdy pierajšoŭ miežy zonaŭ kamfortu i zdarovaha sensu. U numary pad nazvaj «Murmansk» ustalavali hipsavuju kopiju znakamitaha pomnika «Aloša» — savieckaha manumienta abaroncam Vialikaj Ajčynnaj vajny. Ciapier pastajalcam prapanujuć zasynać pad pilnym pozirkam vieličeznaj bietonnaj fihury sa zbrojaj za śpinaj.
Hatel vyrašyŭ aformić svaje numary ŭ styli roznych rasijskich haradoŭ, raspaviadaje «Astra». Kali ŭ inšych pakojach možna sustreć łakalnyja arnamienty ci piejzažy, to «Murmansk» vyrašyli prezientavać asabliva. «Zachodziš — i adrazu razumieješ: heta nie prosta numar», — z honaram adznačajuć u apisańni hatela.
Reakcyja karystalnikaŭ sieciva akazałasia dalokaj ad patryjatyčnaha zachapleńnia. Asnoŭnaja emocyja — strach. Ludzi adznačajuć, što susiedstva z «čužym i vielizarnym» mužčynam, jaki staić nad taboj, pakul ty śpiš, miakka kažučy, nahaniaje žach.
«Što naohuł rabić, kali ŭ tvaim numary niechta čužy i vielizarny? Toje, što ŭ jaho za śpinaj zbroja, — ja naohuł maŭču, choć sprasońnia naŭrad ci źviernieš na heta ŭvahu. Žudaść žudasnaja», — pišuć u kamientarach patencyjnyja hości.
Asabliva žyva karystalniki ŭjaŭlajuć atmaśfieru nočču: kali śviatło lichtaroŭ ci miesiaca padaje na hipsavaha sałdata, numar pieratvarajecca ŭ dekaracyi da filma žachaŭ.
Pomnik «Aloša», aryhinał jakoha staić u Murmansku z 1974 hoda, — heta miemaryjał u honar sałdat, zahinułych u Vialikaj Ajčynnaj vajnie.
Ci karystajecca numar papularnaściu, nieviadoma.