87 rubloŭ zarobku i asablivyja ŭmovy dla niekatorych studentaŭ. Vykładčyk BDUIR źviarnuŭsia da Łukašenki

U adkrytym zvarocie staršy vykładčyk kafiedry prahramnaha zabieśpiačeńnia infarmacyjnych technałohij BDUIR Dźmitryj Anoška śćviardžaje, što va ŭniviersitecie asobnym studentam dajucca niezakonnyja pryvilei, a jakaść padrychtoŭki śpiecyjalistaŭ źnižajecca.

Dźmitryj Anoška. Skryn videa

Dźmitryj Anoška pracavaŭ va ŭniviersitecie dvanaccać hadoŭ. Ale za listapad 2025 hoda jaho zarobak skłaŭ 87 rubloŭ.

Pavodle jaho, heta «vynik niaŭchilnaha vykanańnia mnoj zakanadaŭstva našaj krainy i supracoŭnictva ź dziaržaŭnymi orhanami».

Hetamu papiaredničaŭ kanflikt. Pa słovach Dźmitryja, jon nie staŭ pravodzić dystancyjnuju atestacyju studentaŭ dzionnaj formy navučańnia, bo heta nie pa praviłach. Vykładčyk pravioŭ atestacyju ŭ vočnym farmacie, paśla čaho atrymaŭ vymovu. Jon abskardžvaŭ vymovu praz kamisiju pracoŭnych sprečak i ŭ sudach, dajšoŭšy da Viarchoŭnaha suda, ale biespaśpiachova.

U vyniku Anošku zvolnili pa zakančeńni kantrakta, ale pakolki patrebny vykładčyki, dazvolili pracavać na ŭmovach takoha zarobku.

Raźlikoŭka Anoški. Skryn videa

Adnoj z hałoŭnych pretenzij Anoška nazyvaje rehularnaje pryznačeńnie čaćviortych pierazdač z kamisijaj nasupierak praviłam Ministerstva adukacyi, jakija praduhledžvajuć nie bolš za try sproby. Anoška apisaŭ try padobnyja vypadki ŭ 2023—2025 hadach. U kožnym ź ich asobnamu studentu, jaki ŭžo nie prajšoŭ pierazdaču z kamisijaj, pryznačali dadatkovuju sprobu biez zakonnych padstaŭ.

Staršynioj kamisii nieadnarazova pryznačaŭsia prarektar — pryjom, jaki, na dumku vykładčyka, dazvalaje harantavać patrebny vynik.

Anoška kaža, što ŭ BDUIR isnuje praktyka asablivych umoŭ dla asobnych studentaŭ: praciahvajucca terminy likvidacyi zapazyčanaściej, nie vykonvajucca ahulnyja praviły adličeńnia.

Jon zhadvaje vypadki, kali studenty ź vialikaj kolkaściu «chvastoŭ» nie adličvalisia, atrymlivali niezvyčajna doŭhija mahčymaści dla zakryćcia zapazyčanaści abo praciahvali navučańnie ŭ abychod ahulnych patrabavańniaŭ.

Fota: BiełTA

Anoška narakaje taksama na ahulnaje źnižeńnie jakaści padrychtoŭki. U niekatorych dyscyplinach, u tym liku ŭ jahonaj, kolkaść łabaratornych zaniatkaŭ była skaročanaja napałovu i zamienienaja zahruzkaj hatovych rabot u elektronnuju sistemu.

Na jaho dumku, heta pazbaŭlaje studentaŭ narmalnaj praktyčnaj padrychtoŭki, a vykładčykaŭ — mahčymaści bačyć, jak student sapraŭdy pracuje i zasvojvaje materyjał. U vyniku, śćviardžaje jon, vykładčyki vymušanyja spraščać zadańni i pracedury abarony, faktyčna panižajučy ŭzrovień padrychtoŭki śpiecyjalistaŭ.

Z univiersiteta, kaža Anoška, sychodziać śpiecyjalisty, a maładyja i mocnyja vypuskniki, jakich sprabujuć utrymać u vykładańni, chutka rasčaroŭvajucca ŭ sistemie. 

«Ja doŭha padbiraŭ słovy, kab koratka acharaktaryzavać toje, što adbyvajecca ciapier u BDUIR. I, kali sumlenna, nie znachodžu bolš dakładnaha słova, čym «sabataž». Sabataž dziaržaŭnaj palityki ŭ śfiery adukacyi jak minimum», — zajaŭlaje Anoška.

I prosić Łukašenku:

«Ja prašu vas uziać pad asabisty kantrol toje, što adbyvajecca ŭ BDUIR, zabiaśpiečyć pravierku pa ŭsich vykładzienych faktach i, napeŭna, samaje hałoŭnaje — viarnuć studentam vykładčyka, jakomu nie ŭsio roŭna».

Kamientary da artykuła