Makron: Jeŭropie čas pračnucca
«Heta ŭnikalny momant, kali prezident ZŠA, prezident Rasii i prezident Kitaja vystupajuć suprać jeŭrapiejcaŭ», — skazaŭ prezident Francyi.
Fota: Byron Smith / Getty Images
Jeŭrapiejcy pavinny aktyvizavacca i abaraniać ułasnyja intaresy, bo ZŠA, Kitaj i Rasija ciapier «rašuča suprać» ich, papiaredziŭ u piatnicu prezident Francyi Emanuel Makron.
«Nie varta niedaaceńvać, što heta ŭnikalny momant, kali prezident ZŠA, prezident Rasii i prezident Kitaja vystupajuć suprać jeŭrapiejcaŭ. Tamu heta pravilny čas dla nas pračnucca», — zajaviŭ Makron padčas dyskusii z premjer-ministram Hrecyi Kiryjakasam Micatakisam, arhanizavanaj hazietaj Kathimerini u Afinach, piša Politico.
«My pavinny być krychu bolš upeŭnienymi ŭ sabie i prapanoŭvać ułasny paradak dnia», — dadaŭ jon.
Francuzski prezident taksama zajaviŭ, što čakaje, što napružanaść z ZŠA budzie praciahvacca i paśla prezidenctva Donalda Trampa.
«Heta histaryčnaja tendencyja. My možam supracoŭničać z ZŠA pa niekatorych pytańniach, i heta ŭsio jašče maje sens z-za ahulnych kaštoŭnaściaŭ i histaryčnych suviaziaŭ, ale ja sapraŭdy liču, što taki padychod ZŠA zachavajecca», — adznačyŭ jon.
Jon padkreśliŭ, što hałoŭnaja roźnica pamiž pieršym i druhim terminami Trampa ŭ tym, što mnohija jeŭrapiejskija krainy ličyli pieršy termin vyklučeńniem, jakoje skončycca i nie patrabuje fundamientalnych źmien.
«Ciapier mnohija kalehi bolš jasna bačać situacyju, bo paśla stolkich hadoŭ my kažam: dobra, nam treba reahavać. My pavinny dziejničać jak jeŭrapiejcy, być bolš zhurtavanymi, abaraniać ułasnyja intaresy. I dla mianie heta pravilny kirunak».