Dziarždep ZŠA vypuścić limitavanuju sieryju pašpartoŭ z vyjavaj Trampa ŭnutry
Abmiežavanuju sieryju pašpartoŭ pryśvieciać 250‑hodździu niezaležnaści ZŠA, jakoje budzie adznačacca ŭletku.
Dziaržaŭny departamient Złučanych Štataŭ Amieryki vypuścić abmiežavanuju sieryju pašpartoŭ z vyjavaj prezidenta Donalda Trampa na ŭnutranym baku vokładki, paviedamlaje Politico sa spasyłkaj na pres-sakratara Dziarždepartamienta ZŠA Tomi Pihata.
Na apublikavanych vyjavach pašparta — partret Trampa, nakładzieny na tekst Dekłaracyi niezaležnaści na ŭnutranaj vokładcy, ź jaho podpisam załatoha koleru, a taksama staronka z vyjavaj ajcoŭ-zasnavalnikaŭ padčas padpisańnia Dekłaracyi niezaležnaści.
«U suviazi z adznačeńniem 250‑hodździa ZŠA ŭ lipieni Dziaržaŭny departamient rychtujecca vypuścić abmiežavanuju kolkaść śpiecyjalna raspracavanych pašpartoŭ ZŠA ŭ honar hetaj histaryčnaj padziei».
Pres-sakratar Dziarždepartamienta dadaŭ, što hetyja pašparty buduć mieć «tyja ž elemienty abarony, jakija robiać pašpart ZŠA samym biaśpiečnym dakumientam u śviecie».
Pavodle słoŭ pradstaŭnika Dziarždepartamienta, za atrymańnie pašparta dadatkovaja płata nie budzie spahaniacca.
Čakajecca, što novyja pašparty buduć vypuščany ŭ lipieni ŭ ramkach inicyjatyvy administracyi Trampa «America250», jakaja ŭklučaje pajadynak UFC u Biełym domie i vuličnyja honki Grand Prix u Vašynhtonie.
Čytajcie taksama:
Tramp daručyŭ padrychtavacca da doŭhaj błakady Armuzskaha praliva
Bieły dom apublikavaŭ fota Trampa i Karła III z podpisam «Dva karali»