«Maje patrebu ŭ adpačynku». Orden karmielitaŭ raskazaŭ pra stan Hžehaža Havieła

Orden karmielitaŭ paviedamiŭ pra stan svajho manacha Hžehaža Havieła, jakoha 28 krasavika vyzvalili sa źniavoleńnia ŭ Biełarusi razam z žurnalistam Andžejem Pačobutam i jašče tryma asobami.

Hžehaž Havieł

«Na hety momant brat Hžehaž paśla razmovy z ajcom Pravincyjałam znachodzicca ŭ kole blizkich i maje patrebu ŭ časie na adpačynak paśla ciažkaha vyprabavańnia. Stan jaho zdaroŭja dobry, adnak ciapier jamu patrebny spakoj i pieradych», — paviedamlajecca na sajcie ordena.

U zajavie Ordena karmielitaŭ adznačajecca, što vyzvaleńnie Havieła stała vialikaj palohkaj i nahodaj dla ŭdziačnaści jak dla bratoŭ Polskaj pravincyi ordena karmielitaŭ, tak i dla ŭsich, chto padtrymlivaŭ jaho malitvami.

Hžehaž Havieł — hramadzianin Polščy z Krakava, manach katalickaha ordena karmielitaŭ. U lipieni 2025 hoda paviedamlałasia, što jon abaraniŭ mahistarskuju dysiertacyju. 

U vieraśni 2025 hoda prapahandysckija miedyja raspaŭsiudzili infarmacyju pra jaho zatrymańnie ŭ Lepieli. Mužčynu abvinavačvali ŭ «špijanažy» (art. 358 Kryminalnaha kodeksa) — nibyta za atrymańnie płana biełaruska-rasijskich vučeńniaŭ «Zachad-2025».

U siužecie pakazali razdrukoŭku dakumienta Uzbrojenych Sił Respubliki Biełaruś z hryfam «Sakretna» — «rasparadžeńnie ab arhanizacyi padrychtoŭki i ŭdziełu ŭ SSU «Zachad-2025». Pavodle viersii prapahandystaŭ, palak atrymaŭ jaho litaralna za niekalki chvilin da zatrymańnia.

Kadry pieradačy dakumienta ŭ mašynie taksama byli prademanstravanyja — padobna, što jany byli źniatyja schavanaj kamieraj.

Hžehaž Havieł byŭ vyzvaleny ŭ miežach abmienu źniavolenymi pamiž Polščaj i Biełaruśsiu razam z Andžejem Pačobutam, Tomašam Biarozam i dvuma małdaŭskimi aficerami, aryštavanymi ŭ Rasii.

Kamientary da artykuła